KATAKWI – Kangin ibore ejatar apaarasia 40! Ko Katakwi itunga lu edolete 25 kesi eraasi 11.1.2021 apotu nukec apaarasia kongetakinos.
Ngul kesi ber emasete ikwamin ko Katakwi CPS kanu ebe, aimat ejae keda
abilit ikisila lu alainikin kanu ekorona.
ACP David Wills Ndaula, DPC loko Katakwi ngesi abala ebe, itunga 25 aimoriarit; angor 2 kede idwe 13 lu ikaru 13 kwap kesi abu polis kigalalau kopotolo kec .
Abala ebe, ikamakitai ngul orot lo apolon lo Katakwi – Soroti neda lem atukonokinos aitutua apuru kec aimat ejae.
Ndaula ngesi eyatakit ebe, ice kalu kesi aponi kikamakinai ne esesenere
video, timber.
Ndaula ngesi etogogong ebe lu kere 25 kesi akaulo na aingic kodoco eponio
aremor adieket kanu aimat ejae, keda amwangit ainapeta nu esipokit apuga kanu aitiji adeka na ekorona kowai lo alainikin.
Charles Okwi keda James Okello kere lu kotaun lo Katakwi kesi eyalamasi ebe, edolit apolis aikam amatak ejae konye mere idwe. Aiterot na itunga nesi na ebe, ipolisin lu pac etolomunio kesi mam iswamaete nu itekoro.
Okwi ngesi abala ebe, ejok aicorakin idwe ebe, erai amumu na erono noi. Milton Saile, lo Angopet cell ko Katakwi TC ngesi amonyi ebe, aridakinio naka polis kacut akacun idwe lu didik nesi mam ikisila ecamakitos.
Konye James Olupot lo ocaalo lo Akoboi kotem Guya –Guya ngesi itoronit atumunak kanu aswamisio nu aimat ejae keda amwangit nu esipokit apugan kanu aitiji adeka na ekorona.
