KEDILOKITOS egangitok lu ewalakitos aikor isirigin, asabuunyu kede amuunyu ne ejaasi aseak aikungun Epiot nape ecila kide. “Honerebol, kitimite kanu isio aitolitol aimom kon,” abala Omugur lo apolokit aisup aseeta elimokini Epiot lo abwoi korwaite anaaga. Kiyatakini ebe;
“Nu iponitor isio kesi aikwenyakin ijo ebe, apotu isio kangetakisi emission ejok. Edauna ngina kere! Kobongok do ijo akapet konye kiitunite alosit aseo kecau akwap. Kabongosi ber isio aidar etepegak siri kesi da kekorasi iboro lu idau isio akorakin aseak wok,” Eyatakit Omugur lo anapit ekabutu, edabada lo ipu isaon kede abutus kosuwenyikinete kede ipaup ke. “Awiinyi, lolo kana, kilosi oni airabet cut. Ecai erot kere,” abala Epiot iweweikini aberu ke konui toto kec idwe mwiiinch!
Kosodi awoikin ekosio ke; “Yoo leng. Wan okatakata! Yoo leng…” Abu ekosio lo kowiinyik aberu ke Epiot kosodi aswolaun aitub ekosio kwa iswamaatar Achoolin ikosiete ikososinei luka Ichoolin kede Ilangoi lu eramere aderekai kede ipirin luka egaali kokusete ipiriigei. “Tililili! Yoo leng. Yoo leng wan okatakata….” Icurosi lu wok toni aidonar einyinyir ikarei do aberu eporoto kuju! Itiunitos do luwok angaar ekek osawa ediope adumun ebe ileleba alaro pas! Atukunos nan aseak lu ocaalo ediope kere
kanu ekare ka eiswil lo adoit ore ekadidet kec.
Abu aswam kopolok Epiot aitetemikin ‘ipejok’ ke lu eboyeete icie k’obalasa, alaro, arurumo nuka idulai icie kobwoboete k’orute loka awii airere imongin lu wumek ka ataak nu rosok nu aticiepak awomitos kesi abeit aikangas kanu epucit.
“Aaah, ateker, Eeeh.. Eyalama ber eong awanyun yesi kere ikatunga. Lolo ne kijaun. Konye, komatasi ber akima ngun imaio ngun dodo, kwape ijenatar yesi, lolo oni kere aidiyaar aseo. Aseun eong kanu alosit airabet na apolon. Eeba, P.6. Mam bobo eong akoto abongobong atukot naikanyet. Ipupete yesi?” abala Epiot. Apotu aseak icie kogeutu asuweinyikin mot mot. Icie itoritos agulei. Idwe bon apotu kosalakisi aidarit euji lo aringasi apesur isinepete akim. Edoli aimar aseeta okadete Epiot abootin.
