Engarenok luko Katakwi kesi aroikisi RDC kec, John Steven Ekoom kanu aiboi kotoma aiboisit na idarere ibaren kojena kwape Ajesai..
Aponi kicorakinai ajalakin ajotoenen nen kotoma aurianet na ekansulo na ajaikina eraasi 27.08.2021. Ejaikitai ngesi esabiiti kanu aijal ajotoenen ‘otogoi’ lu ibaren konye edumunit Aicerit aiyeya ebe, mam akiro ijulakina.
Abalasi engarenok ebe, irumit Ekoom aiboisit ngin kwape ere ke konye korai ne ebeitor aidar ibaren.
“Amen RDC aipagisa etogo ke konye apele ajoto ne ebeit ibaren,” abala ediope engarenon.
Irene Among kede ikansilan icie kesi abalasi ebe, ebunit angurian ngin kane ejaasi itunga icie, lu apotu kicorakisi ainerakin ka RDC.
Eyatakit ebe, itacaunitos itunga ebe, ewanyunenete kesi ipajan ke RDC ipoyenenete ido ediope etunganan ngesi idarenene akinei ke.
Abdu Okeng, egirigiran loka etatai ko Katakwi ngesi anguriani ebe, itosomae kwana Ekoom apedor na eyapesi ke kanu aitolitol ainapeta nuka apugan.
Etoronit Okeng ofisa loka ibaren, Dr. Onyait Ariko kanu ebe acedakina aiswamanara ka Ekoom adaun apak na ewoj, ibore ebe, ijaikit Ekoom elosi ajotoenen aibosiit na ibaren.
Geoffrey Omolo, apolon eicolong loka LC5 ko Katakwi ngesi abala ebe, edolit itunga luko kwap koraasi emedaunak lusodit mere ngun lu ijaikitai aidarit iyapesin.
Inerasi ka arotak iyemuto, abala Ekoom ebe, mam ngesi ejotoenene aiboisit na idarere ibaren konye ebe, egipanarete itunga emotoka ke bon ebwoenene kanen.
Etacaunit ebe, enyamitok ke kesi ejotoenenete nen kanu ebe, aisikapikit ayuara aiboisit ngin.
Aiboisit na idarere ibaren ko Ajesai ngesi edukitai keda imilionin luka apiyai kotoma ainapeta nuka Resilience.
