UGANDA – Nepe ideuna apaaran adiopet bon kodoluni aseo naka 2021, President Museveni, ngesi ecoraki ipolisin luko Kampala ainyakakin ibodai ipikipikin kec katipet kanoinoi ngun lu ijesara imusaagon kangun lu ekamio kanu abilit ekisil lo alosite lo pac ejeruni e president.
RCC nako Kampala Faridah Mayanja, ngesi abala ebe nepe etubitoi e president ko Kampala abu kowanyu ipikipikin eperete bala anya ido abu koumok eipone lo ejarata ikulepek ido kolimuni ebe ekot kinyakakinai katipet.
“Abu e President kolimor katipet ebe ekot ibodai kinyakakinai amanisa kec,” abala Mayanja.
Airimokin Uganda kere, ipolisin kalu ayuawara kesi apotu ikamunitos ipikipikin kanu ebe abilite ekisil lo elose ka ebe ekafiu lo aponi kitegearai olap lo Okwang 2020 kanu adeka naka Korona.
Ido ebe asalakisi ipikipikin lu ipu polis naarai mam ikulepek epedoritos alemun apiyai kanu alakuna karai mam apedor aitac ipuliidan okootin lu apolok.
Ipolisin ko Uganda kere kesi mam ber etukokitos enaaba lo ipikipikin lu ekacunitos kesi.
Alibuneta nu iyemuto, kesi ikeunitos ebe ewoda ke Museveni, nesi alomu akaulo na lu ikamunitos akiro nu ibodai amonyakin ngesi kanu ebe ipikipikin kec lu ikamaritai ido kododor agwelario ibore abu ikeu kesi abukio.
Atupiton eraban loka ipolisin koibuga Kampala Luke Owoyesigyire, ngesi abu itogogong ewoda ke Museveni, kobala ebe adautu kesi ageun acamakin ainyakio naka ipikipikin lu akacunitos kesi.
“Ikulepek ipikipikin icie adauto aomunun lukec Ido icie kesi ekoto alosite otesenin luka polis keda akaadin kec nu asomu ka abaluan lu itodunitos ebe ijo elopet epikipik.
Ilosi isio ainyakakin ngun lu ikamunitai apaarasia nu ekafiu ka lu egwaunitos imusaagon ludidika,” abala Owoyesigyire.
Abala ebe etekerak ipikipikin icie kesi acilakitai arisiitin kesi abeit aitac apiyai obank eroko elemuna ipikipikin kec.
Mam Owoyesigyire abu kitacau karai elemunete ngun da agaalin kec. Kobala ebe ngun lu ediakaritos ikeara imusaagon kec kesi mam edumunete lukec toni ber akiro adaun.
Kodumak aidules acie otoma apapula!
