TESO – Akaulo na aikilikilanar adaun ikaru lu ipu ejaasi kwap na engarenone ke Emorimor papa Iteso, Ikumama kesi do adautu pac apotu kogitasi ekiala kec.
Eraasi apaarasia 07.07.2022, apolok atekerin nu Ikumama kesi apotu otukokinos odistrikta lo Kaberamaido asekun engarenon kec ido emaikinitai kwana engarenon kec ebe “Won- Atekerin.”
Arai ikukulerun iuni kesi abwoitos amariaun eicolong loka Won- Atekerin.
Akaulo na aseo Rafael Otaya lo elomunit ko Merok, otem lo Katine, Soroti ngesi abu kiteleka akaulo na amukun aseeta 244, George William Egweu lo Alwa Sub County, Kaberamaido ngesi abu oraun lo iareit akaulo na aigalalaun aseeta 84 ogolokini do Robert Ewangu lo elomunit otem lo ocelakuru, edistrikta lo Kalaki keda aseeta 51.
Ebeit do kwana lu apolokinitos aseo na, aisukunyaar iyemuto lu aitodolikin orionget lo apugan lo epamerone lo epolokinit akiro nu einono tetere apugan itogogongori ateker kec kwape na kwana eyaikina bon.
Erai lem ateker na itunga lu inerasi akumama na imorikikina kwape adiopet.
Eja ngun da, ikumama kesi lem ikilikilasi atiakar ateker kec kane ejasi iteso narai ebe mam kesi inerasi angajep adiopet karaida eputonoro akiro acie kotoma oiner kec.
Won-Atekerin Otaya ngesi kwana eraun lo ipugai ikumama ke lu iboete odistriktan luko Kaberamaido, Kalaki ka Soroti.
Abu do ekesa je isumunik aimorikikin ikumama kere kotoma aiboisio nu egelegela tetere epedorete aitopol einono kec.
Ido ilipit do ngesi apolok atekerin ka atumunak kere arukun inonosio lu ajokak, ayoungit apolok tetere aparasia kec iyatakinos.
Engauna eyaitene lo Ikumama kotoma apak na mam ber Teso inapakinar kotupitete eigur lo apurun kanu aseun Emorimor ecie kanuka Iteso abongokin apoga.
