KATAKWI – Mam arai ailiak na apatana kiding ikiliok ikanyape ko Katakwi distrikt kanuka amariaun emakuk loka apolon eicolong loka LC5.
Geoffrey Omolo (obonipe), Paul Ongoet (FDC), Joseph Opul (NRM), Raymond Richard Odeke (obonipe), James Peter Ogeatum (obonipe) kede Charles Okideny (obonipe) kesi edolakitos ipalei kanu emakuk kangol.
Kedau Martin Musoke agwetakin aisup aseeta, arai aseak 48,316 aitemokin atiakun imongin kane ejaasi itak kitwasamaete abootin.
Omolo ngesi abu kopedo adetun emakuk akaulo akakaun abootin 16,355.
Okideny ngesi atamit aibwapakit ngesi kede abootin 14,601 kotupakini Joseph Opul kede abootin 13,890.
Abu kosub bala arai ilaganoi iyarei ajaikina toma abolobol adiope naarai abu Ongoet da kocupo aingarenikin Raymond Richard Odeke lo abu kodum 1,413 kingarakini Ogeatum aigol ekek kede abootin 491 bon. Abootin 1,566 kesi apotu kitumosi Ongoet tape eraun loiwongonet.
Aseetait na ocaalo ke lo Oale nesi bon ingarenikitor Ongoet.
Opul ngesi abala ebe, engetakina aseo ejok.
Kotoma abolobol kangin abwaak iyerei kesi alomunitos kobuku Ngariam.
Arai; Omolo, euriat lo kotem Getom kede Ongoet, euriat lo kotem
Katakwi. Odeke kede Okideny kesi alomunitos kotem Guyaguya, kobuku Usuk ido Opul bon ngesi acaruna kobuku Toroma, ibore ejaikit itunga akurianu bala ti emakuk edoit akanin ke Opul, konye nen da tai.
Akaulo Jesca Rose Alupo Epel na elomunit kotem Usuk kobuku Usuk anyamaar emakuk loka MP na aberu amunosi bobo itunga icie bala ti arereng edo akanin ke Opul kwape eraar ngesi bon elomunit ko Toroma konye esubit bala adaunit Omolo aipirun aipany.
Erai ebuku Toroma nesi elal noi ko Katakwi ido ajena lem ebe, itunganan yen ibwoki etem Magoro ngesi edaki emakuk.
“Erai aumokin ebe, abu Okideny kicat araun lo iyareit akaulo Opul aipunupun ngesi kede Odeke kotoma aseo naka NRM Puraimares,” abala Stella Akiror na kotaun Katakwi.
Ingai bo Omolo?
Kolomunite kocaalo loko Cheele, eitala Abela, esiomit Omolo kwape epiriotit lo akiro nuka ediini kede akiro nu aidar apiyai kadoketait na ediploma.
Kanu aitub ke abala Omolo ebe, “arai akote naka Lokasuban ngun aiswamaun kwangin naarai atamitai ti akokoar arerengu ngin. Abu eong kapedo atiror itunga koiponesio lu egelegela kwapenat; aissianakin itunga.”
www.aicerit.co.ug | Na Emmanuel Olinga ka Emmanuel Opio
Abala Omolo ebe, ebuni ngesi adukun eidicane kiding eswamak lu apugan kede ikansilan kotoma apaarasia 100 nu ajaut ke oyapesi, e.
Eburokini Omolo ejakait Walter Okiring Elakas.
Kodumak aidules acie otoma apapula!
