Inyobo ebirori NRM ko Soroti?

SOROTI – Aseo naka President ka naka MPs na etolosio Naiwongonet
araasi 14.01.2021 nesi etodu ebe eringa epate loka Forum for Democratic Change (FDC) egogong ko Teso kacut Soroti distrikt ka ebooma Solot.

Kotoma aseo na okaru lo 2016, MP loko obuku Dakabela, Cosmas Elotu ngesi bon MP lokko opate loka NRM lo abu kotub ko Soroti.

Lucie; MP naberu ko Soroti distrikt, Angelline Osegge, MP Soroti Municipality, Herbert Edmund Ariko araasi luka FDC ber, kosodi lo obuku Soroti, Kenneth Esiangu Eitunganane ngesi arai Obonipe.

Lolo kana, karaida ekopunit NRM eicolong loka MP lo ebuku Soroti, kelimor Patrick Aeku kwape etelekaran, MP loko obuku loietet Gweri, Tom Julius Ekudo, MP naberu nako Soroti distrikt, Anna Adeke Ebaju, MP naberu na ebwoikit Soroti City, Joan Acom Alobo ka MP loko Soroti City East, Moses Attan Okia kesi eraasi luka FDC.

Ikote akiro nen da, MP loseuna loko Soroti City West, Jonathan Ebwalu (Obonipe) ngesi sek ajai toma FDC.
Itunga luipu kesi inerasi ebe erai aseunio naka, Adeke, Ekudo, Alobo, Attan kitoni Ebwalu da akirot naka aumokin na itegelikina!

Kanu inyo?

Nasodit, kelimo erionget loka aseo akiro kwa ajaatar Naikanyet, abu apolon eicolong loka epate loka NRM ko Soroti distrikt, Charles Elasu nepepe kede abwaan, David Calvin Echodu, kotacata apak kotoma oredio kanu aisialamikina ngul lu atuboto aseo, aseak kosodete ailip itunga kere ainapakin.

Aupasi Elasu ka abwaan Obonipe kwape iministan. Esalete kwana ngun kwape MPs, aso MPs mam isirigin ipu kwa iministan,” etetemi Elasu.
Konye aseak luipu kesi mam eseitos engarenok lu aseun titai.

Peter Edeku Edopu lo lem aboloboloi kwape obonipe kobuku Dakabela ka atupiton sek RDC loko Katakwi, Vincent Enomu. “Ikosi itunga, adaun aseo. Aso enapakinos aloto ingaren kede akiro nuka apol,” abala Echodu.

Ecicing itunga kacut ko Teso acamun aitelekaro kotoma aseo ido na etiono kakere ngesi Etesot acamun ‘aicanican’ isirigin ke agwelia apak kotoma
oredio kanu aisialamikina ngin yen elany ngesi! Atitingu ke Echodu,
Elasu, Edeku ka Enomu aswam ngin nesi itodunit ebe etiokitos, icasitos kesi
kotoma politiks.

Abu Elasu kolimo ebe kwape epate, lo epol ko Uganda, aseikit NRM itunga luko Soroti abolobolok ikanyaarei lu etiokitos; Imongin imaseniko iwongon ka akituk nu robok aarei Cosmas Elotu (Dakabela), Patrick Aeku (Soroti),
Richard Elimu (Gweri).

Icie kesi; Julian Fede Iseet (MP naberu ti Soroti City), Jesca Leah Amigo (MP naberu ti Soroti distrikt), Jimmy Ekemu (Soroti City East) ka aturubango David Calvin Echodu (Soroti City West).

“Itunga lu ikanyaarei kere eraasi lu ti kelototo airabet kosodete aikamun arereng na asekunio kotoma okabinet kwape iministan lu ti epote aitopol ateker.

Konye do etwasamata itunga luko Soroti apedor kec kosodete aseun etepegak apugan kede lu Obonipe. Mam apugan eseuni etepegak karaida lu Obonipe kwape iministan.

Esalete kwana ngun kwape MPs, aso MPs mam isirigin ipu kwa iministan,” etetemi Elasu. Konye aseak luipu kesi mam eseitos engarenok lu aseun titai.

Inyo ngin?

Ko Soroti, eponitos itunga ewoete ebe adaun apak na esawa (Ariko). itwasamat Ariko ejenunet lo esawa kanu aiwadikaunos. Apotu aseak kosubitos bala engisitos ngesi ne ebwaikinit ngesi elacet esunitai koloje Ariko kitwasamai epate loka FDC kanu alomaria airabet.

Kwangin abu do Moses Attan Okia kitwasam arereng ngin kanu alimokinia aseak lu engisitos elacet ebe ajeni ngesi ne enyekitos Ariko elacet kec ko Kampala.

Kotupitete eipone lo eseya etaun loko Soroti, mam ngun asubitos bala
araasi aumokineta kana ejaasi itunga luko otaun Soroti.
Aseak kesi alingitos aseeta kec, ido atakani bala arai alosikinet kec adiopet; aitutub abwaak lu itepegitos apugan.

Atam Attan abwa kotaun Soroti irwan auni, esubit bala apotu Isolota kiirasi nuke kosodete aitim ngesi da. Kwangin karaida ajaasi abwaak kwape nat Jimmy Ekemu etamitos aikeit emendera loka NRM, asubit bala mam ajenete eipone lo abeitor aibwanan emendera ngol.

Ekemu nges atam ngesi da Soroti irwaan aarei, konye eipone lo ajaar aseo mam cut asubit bala apedori ngesi agwelar kama ejaasi kesi.
Ngupe akiro nu apotu kotupaasi Jonathan Ebwalu ko Too nako otaun Soroti.

Edeleleunit cut ageunet ebe alomun ke Calvin Echodu toma akiro nuka poltiks nesi mam epimatai nuke elomuni ejok.
Elomunit Echodu Soroti kibwananite aboolai nu alaci ngesi duc ne eriamunotor kede aseak.

Konye ngun kere asubitos bala arai esoo auta ngesi aitodiar mama ejaai aseak. “Euta ber ngol aimugole kanu aidokio araun epoltisian,” abala asean ediopet lo mam akoto ekiror ke kolimorai.

Asubit teni ngin bala arai aimugole, naarai kotoma kiro nuka poltiks, ekot
duc etunganan korai lo edolokinio, kodolokini kgesi da aseak.
Aseak luipu kes abakasi ebe mam Ecodu arai etungan lo apatana adolokin, ido itunga lu alukitos ngesi kes mam ejaikitos abwaan airiamun kede kesi.

“Etiono duc airiamun kede abwaan lo, kangin duc ibuni isio oreke, konye egoloritai je,” abala Yokana Elibu loko Majengo. Karaida abu ngesi kolomunite kotoma opate loka NRM, ationis ke Echodu acie nes edoditetere itunga lupoti kotoma NRM kanu mam aigangit ngesi.

Nen do ngesi abunio abwaan Jonathan Ebwalu (obonipe) kikamunia arereng na aibwok emakuk.
Arai kolo Ebwalu eswamam oredio loko Voice of Teso, kikamamara kede epate loka NRM konye abu kowen imugug kitoni alomar FDC.

Alomun ke Ebwalu nes abu kijaik ekaabi ke Echodu aiterot, kacut naarai asipit kolo Ebwalu isus ne abunio kidediaror aseo na okaru 2016 “Murem Murem….., ngol nes eipone lo abu Ebwalu kitorio akirot ke na aitiji akoko na alupok.

Esubit bala apotu teni itunga da kiirasi akirot ke, kosodete abuburikin toma aboolai nu alaci Echodu; konye kopeleikitos aicak Ebwalu.
Acie akiro nu ebe apotu kiduposi Echodu, nes amamus apedorit aijaikin abwaak apupun eporoto ke, kwa ipudatar itunga.

Mam teni ngesi kede egangitok ekampein ke asubit bala apotu kiirasi akirot ngin sek, teni edoluni Naiwongonet arai bodo aiwen imugug.
Abu Echodu konomo bobo itunga luko Soroti, kacut ngun lu itepegitos epate loka NRM kelomaki ailitoi kede edege.

Luipu abakasi ebe auta do ngesi aimala itunga na awasia kanu abongor akwap na Amerika ne iswamai ngesi.
“Apotu isio asubata asipadin, ka ailungulung agoloron kanu adiuna edege kwap,” abala Emma Okido lo Pamba.

Kowai lo angor nuko distrikt kede city mam akiro alaete kowai loko NRM kiuconosi aseak abwaak kec kere. Ko Soroti city ationis ne abu konganyakin
NRM kebongutu angor nu ebiroro ko puraimaris kec aitiji Julian Iseet na abu kodakarite emendera.

Adeke Anna Ebaju na ebwokit emendera kec nges abu kitamat Leah Amigo (NRM) ka Angelline Ossege (obonipe) akipi nu amwak akaulo na nges
aiya Soroti distrikt kowai lo angor.

Atamit NRM ti ajakun eicolong lo, konye adaunitos lu elacet agolokin etogo kede elacet lo mam apedorete luka NRM akepun angara ekupulu lo egoikitere etogo.

---