SOROTI – Irienguni bala eyala epuriei okooti lo apolon loko Soroti, konye koraasi akiro nupo tiok. Atubio na emusaago kiding MP Herbert Ariko ka Michael Enyagu Etadu, Robert Onanyang, Stephen Erienyu, Patrick Ejelu, Brian Omoding ka erionget lo aseo korai enaaba 0029 na 2020, korai ailipa enaaba 03 na ekaru 2021 lo aponi kopesikinai etube pac nesi bobo asub bala apet ekomio.
Kotoma otube lo etolomunit Justice Musalu Musene eraasi 26.11.2020 abu ekooti lo apolon lo eboikino ko Soroti, kitutub ebe Aloet ka Opiyai kere ejaasi Soroti City West.
Bobo osabiiti lo atubor atubon Musene ngopengol ngesi abu kijulakin kosodi aitub emusaago ebe, aponi kingalakinai ekooti akiro nu modok.
“Abu ekooti lo mam ejeni kijulak nu adaunit airabet apesikin. Ido akoto aitosoma apedor na ekooti Ekotoi Egunyu ka Magyezi okooti katipet OKWANG 24, 2021 / /3 kalo kasodi aisukunyikin etube ka losek ido iwoodin lu Opiyai ka Aloet kesi autor ko Soroti City Too, ido enyakakin Soroti City East,” abala Musalu.
Abu alimunet ke Musalu koter anyunyuara ka aiyalama ne ejaasi egangitok ka engarenok kalu angurianete idol u ipu apotu itoronata atubon kanu aijulujul itubesinei ke kosubite bala etunganan ecie etolomunit nasodit.
Abala Musene ebe pac ajenanuto nu apesikitai kesi ebe abalasi ebe Kide na eibuga Soroti, nesi ebe erumiarit aibosio nuko Eastern Div lu Soroti Municipaliti, Northern Div, ewoodi lo Aloet lo ejai Arapai TC ka Otatai, Opiyai, Acetigwen, ido West Division kesi ajaasi iwoodin lu Western Divisionlo mojong lu imoriaritos, Agora Ward, Amen TC, Arapai kotoma Arapai TC nasek, Amoru Ward ko Arapai TC, Agama Ward, Oderai Ward ka Amen B.
“Karai koyangaunitete akiro ngun sek okooti ti mam ekooti lo ibwaikit iwoodin Aloet ka Opiyai, Soroti City West icamanara eong ka epuliida ke Ariko ebe ajai aijulujuleta kiding nu etolomunit airabet. Erai do ngin ebe ajai aibucaret kotoma aiwadikaeta. Ido etogogongi ka aikeu ka ainger aibucaret ngin na idelelei ido emamei ekooti lo ikisila isomai nuke nu ecamakitai nesi ecamakii aibucaret ngin asalakin aiwadikaeta,” atubi Musalu, kobala ebe kangin itunganan yeni enguuriani aitac igaraman ke.
Abu Ariko koterar kobala ebe arajakin ngesi etau naarai adaun aitacaun akiro ikoruon nu lem eroikitere ebe ngesi iguri. Ariko lo pac ber abwoikit Alaka ka Co. Advocates, ngesi bobo abwoikit epuliida, Yusuf Mutebuli lo Mutebuli ka Company Advocates, ido Patrick Wateka , ngesi abwoikit erionget lo aseo kidedo Fiona Mirembe kanu ikany lu okuju.
Angeri etube Konye kotupitete nu atakanutu okuju, Simon Peter Edoru Ekuu, lo atupiton apolon eicolong LC5 loko Soroti, korai lo ayait ainapeta nu apugan ido kojaikina aurianeta nu atiakun Soroti City, korai bobo elepunan eipud loka esite ka Stephen Olebe, kesi akerata okooti kilipitos ebe ikopak kesi ekooti etube lo ijerunitai ido ikongokitete acukum na okooti lo apolon, ido ebe ekot eminista lo apuganasia nu okwap Raphael Magyezi ka ecaman LC5 loko Soroti Mikairi Egunyu ikisunos okooti kanu aitacaun akiro nu abu ngesi ikopa Kampala.
Kwape ecaman LC 5, Egunyu ngesi abeit aiwadik ebaluwa ne ejai Magyezi ka aidokokin acamanara na abu ekansulo kitolomu kotupitete aiboikin kanu akiro nuka esite.
“Ikerit isio okooti naarai mam isio imonikina kodoco eipone lo ajaar etube. Ido ikoto awanyun kodoco ebe nupo icamanara isio ko okansulo ngupengun abu ecaman kijuka Kampala,” abala Edoru.
Aicerit nesi epupi itunga ka ikansilan icie ecedunenete ebe esubit bala aponi kijulai akiro nuka ekansulo kosodete ebe alemar acie. Konye iroko ber ijai alaro angicun akiro nu kodoco. Kitosomaete apuliida Phiona Mirembe na Okurut, Okalebo Outeke ka Co. Advocates, kesi ebalasi ebe kitolomunai airiebokinet ber na etube ke Justice Musalu ido ekot lu elimoro okuju akerun okooti Naiwongonet kanu aitacaun akiro kec.
Itolomunitos aimony kec enaaba 09 lo okaru 2021.
Okooti lo apolon do Kejaa ngun da Michael Enyagu Etadu, Robert Onanyang, Stephen Erienyu, Patrick Ejelu, Brian Omoding ka erionget lo aseo kesi akerata okooti lo apolon aijulira etube ke Justice Musene kobalasi ebe mam kesi imonikina nu abu ngesi kitutub eraasi 10.03.2021, ido epesikitos kesi aimony kec ne ejai egirigiran lo apolon lo okooti loko Soroti ko Kampala ido ilipitos ebe kijaikinai kesi akiro nu etube kodoco.
Pac apolon eicolong loka orionget loka aseo, Justice Simon Byabakama, ngesi anyaraunit aurianet na apol noi naka engarenok luka oibuga Soroti kodistrikta keda abwaak lu opatei kalu egelegela ido ajaikina eminisita lo apugasinei kanu okwap Raphael Magyezi aurianet na kanu aitam arior akiro nu ikoruo luko Soroti city.
Apeleikinet na aurianet kana nesi atupakin nu abu adieket na apolon nako Soroti, eraasi 26.11.2020 itutub ebe aiboisio nuka Aloet, Arapai ka Opiyai kesi atiakaritai arii naka Too ko Yigo kalo Soroti ibore da yeni abu ojalak itunga icie mam imokosi. Byabakama ngesi abu kolimok itunga ka apetun amaapun nu etodiaritos ikoruon lu ibugai kalu iyarei oipone kalo atiakatiakitere.
“Nu abu adieket na apolon itutub eraasi 26.11.2020 kesi nu epolok, mam epatana aitepeg adieket naarai esubit bala aibil ekisil,’’ abala Byabakaba elimokini Isolota.
Ajaikina itunga swi toma airiamun na ido Justine Ooja, Peter Edeku ka George William Okoit, kesi apotu kotingaasi Magyezi kobalasi ebe ngesi bala iguri akiro kanu ebe alosite Arapai ka aiboisio acie kuare.
Konye kedoloki Magyezi einer, abu kopeg ebe elosit ngesi ngina osawa ediopet lo atupuruc, ido ebe abu kobilakin kwap kilipite Isolota ka erionget lo aseo aitup nu adau ekisil aitolomun ido ebe abala ebe ajai Aloet Too na eibuga loko Soroti mere Kide.
Konye nu aumokin ne ejulira Ariko etube lo etolomunitai pac, Magyezi ka ecaman kesi araasi bobo ajenak. Kopekwana itunga swi ko Soroti kesi inyalinyala aomisio ido lu ipu itoronitos MP Ariko kanu aigur etaun lo atiakuno loti etamit apol.
Konye Ariko ngesi iketara ebe ajaasi itunga aipwok ekiror ke ido edolit ebe etacau ekooti etube ke kaidules ido mam bobo ekiror ke ipwokio.
