KUMI – Erai teni abeit ebe isomauna kolo aumonokineta apaarasia ke Yesu Kristo. Idio itunganan yeni ekot amisiikin nu kitoik akit. Kotoma aseo na epate loka NRM, Kumi distrikt nesi abu koloma aiwadikaeta nu akwap kere kibirokisi MPs kec iuni kwap.
MPS ber lu ajaasi oboro kesi Monica Amoding, na abwoikit angor, Ismail Orot, lo abwoikit ebuku Kanyum, ido lo abu kodiakakinos kede eministane, ka Charles Ilukor lo obuku Kumi, arai keraun aitup ekisil loka NRM, mam bobo aseak epote agipar ikiroria kec kapapula na aseo okaru 2021. Lu elimoro kokuju kesi kopekwana ewoanaros akaulo na akepakino idaas lu amwakak.
Orot ngesi abu Simon Peter Opolot kitodik erot lo itenaari Kodokoto abongor aira ikito. Nepe iputanari Orot amasurubun, komwana Ilukor epura pee, akaulo na Esidonio Okasai Opolot, aikongokin ngesi kwap kanu aibwok emendere lo NRM kobuku Kumi.
Icodosi Orot ka Ilukor, kidonarite Amoding ayongikite etorube ke Christine Apolot, akaulo na aicanican ngesi kiteete aseak paaran. Ebaikitos luok, kodaunite aminista kolo Christine Amongin Aporu, aidong Muhamood Oonyu Onyi kokiding okolasi.
Inyobo abu kisomaun
Ipiriotin lu aseo kesi abalasi ebe, mam lolo NRM itolosit aseo koipone lo elai. “Kangin aseo itolosio kotupitete ikiroria itunga lu ejaasi oitaabo lo aseo lo epate. Konye nu aumokin karaida elimorit President Museveni, apolon eicolongNRM, nu acamakin itunga kere lu ejatatar kede akaadi na epate aisek, esubit bala mam esomak luko NRM apotu komisiikisi nuke,” abala epiriotit lo mam akoto ekiror ke kolimunai.
Iyatakitos ebe, itodiarit na ebe mam ainapeta nu aseo aponi kitolotoi ejok, naarai apotu itunga kere koburokinos aisek ibore ejaiki aseak ka lu ibiroro engerete akiro nu elimoritai.
Mahmood Oonyu, lo abwoit kanu asekunio kwape lo edakit emeedera loko NRM ko Kumi Municipaliti, ngesi itepegit aseuno naka Amongin. Oonyu lo Abu kodum abootin 3,994, kosodi Aporu adumun 4,034, ngesi abala ebe, aseo na nesi mam arai na etekooro naarai ebe apol akoko ka aitukuriano, aimoriarit aibungao naka egangitok ke, ibore abu koinak abootin ke ikidiokoros. Etogogongit ka aitoron lu eyaitos nuka aseo kanu ebe aponiatar kikisaratar akiro nuka aseo owoodi loka Abubur
– Abosan cell neda abala ngesi ebe abu kodumunitor abootin nu adolitos 402 ailanyia Aporu na abu odum 254. Abala ebe, apotu ayaitok aseo ogiroto aitolomikin akiro ngun oitaabo osodete akisar ebe kanuka amumu na abu obwangun koraida bobo egangitok ke kesi aponi ibungatete.
“Mam akiro nu aseo kangin eraasi nu abeit. Ajai eong aitepeg aseuno ke Amongin kotoma okisila etoritor toma opate. Kanu inyo mam acamakinere itunga aseo bobo do aikisar?” abala Oonyu. Konye Amongin Aporu ngesi imuarit nuke Oonyu kere kobala ebe ekapanakin kwana ngesi apetokin kede MP Silas Aongon lo ebwoi kwape obonipe kede ido abwaak icie.
Abwaak lu apotu abootin okadata kwape nat; James Akodai, Charles Olaboro, Peter Omalinga ka icie, kesi esalakitos ebutaritos ido mam ijeni arai ebongunete kwape lu obonipe araibo mam.
Emonyit ebela kangor da!
Ne duc irukuno emuudu atutubet, ekot itunga kere aigaikin. Arai isal ijo ibwoi, emina asasit aikatar ijo. Ngun kesi bala apotu kisomaunos kodistrikita loko Kumi kidedia Christine Apolot Monica Amoding kililiau abootin 38, 215 kitiiriani kede nu aupake na atukunit 18, 795. Kosodi Enyamiton Phoebe Agwang, aridun 1, 940. Apolot ngesi isialamik itunga luko Kumi kanu aitodikin ngesi amina kec ido isumunit ebe mam ngesi ebuni aisurum kesi ileic. Kitam akodakin kede Amoding mam apatana naarai agwetara isimun ke. Konye esupak aseeta ke kesi elalaete ebe mam aseo enapakina naarai idwe da aponi kimarai. Etoronitos bobo egangitok luko NRM lu apolok kanu ebe aitiji Amoding.
Aiwadikaeta kesi itodiete ebe Amoding ngesi ekukuran kairabet, epelu lo ebeit MP aitolot, ido ijaanakini lem itunga ke.
Pac ne etutubere ekisil lo apukor ikaru luka Epresident aipuga (Art102(b), mam Amoding abu kigang ekisil ngon. Amoding abu koting kau na erisa?
Konye Sam Opolot lo epolokit epate loka NRM ko Kumi, ngesi abala ebe, elosit aseo ejok kilema aiboisit naka Abosan bon na abu amumu kobwangunor nesi aponi kikisarere aseo, ido Samuel Obuya Ogwang, lo epolokit aseo ko NRM, ngesi abu kolimo Apolot kwape na ebuni aibwok emendera loka NRM kanu amariaun araun MP na ebwoikini angor nuka Kumi, Opolot kanuka ebuku lo Kanyum, Opolot Okaasai kanuka ebuku lo Kumi nepepe ka Amongin Aporu kanuka Kumi Municipaliti. Apolokiton ipoliisin ko.
Kumi Charles Mugisa, ngesi itogogongit ebe amameete akiro nu aroko ido amamei idio itunganan aponi ikamunai naarai itolositai aseo paaran ido aiboisio nu ajai amumu abu ayuara oruruk toma apak.
Mam Orot da inpakina
Alimoros aseak
Kodumak aidules acie otoma apapula!
