PALLISA – Aseo naka epate lo NRM kobuku Gogonyo lo Pallisa distrikt nesi mam akiro ke apataka kwape araar ebuku lo itet! Ilukumin luka itunga lu eyalamasi kanu atiakuno naka ebuku kesi bobo abu abuinikin kirum kikengokin ainingosit ingaren kec na asekun abwaan lo ebuni airiong emendera loko NRM kwape MP.
Ekutaki NRM epirigi kanu asekun abwaan ediope, apotu itelepai iwongon kosukoto idabadai. Kiding Sam Ourum, Issa Taligola Bantalibu, Francis Mukula keda Derrick Orone arai 04.09.2020 nesi abu kotakanuna eminat Ipalisa. Kwape ediope kotoma obukui 31 lu pac atiakuni airabet nako Uganda, inosit Gogonyo itemwan kwapenat; Gogonyo, Obutet, Apopong ka Kaukura. “Kijaikisi eong asau ikoku. Eong ngesi ajatar aitapoet nako Gogonyo. Adol oni apak na aitopol Gogonyo …,” eipone ngol alekiata imongin Ateso aikungkung imemban luko NRM aijaikin kesi arereng na aidak imendera kanu abwoikin itunga luko Gogonyo kairabet.
Eroko edolo isawan ikany lu abeitor ageun aseo, ajai eigur kede aretonokin aibosio nu egelegela kwapenat egangitok ke Taligola kede Orone. “Apol airit aseak. Emamei itunganan yen esekunitos aseak kotoma ailajara,” abala asean ediope loko Gogonyo. Amumu na abu koduun kiding egangitok ke Orone ka Mukula nesi abu kongau arasasin nu abuonokinos lu ayuara da esusut ke.
Nape icaki isawan ikanyaongon lu atibong, kogeunete itunga aitoikit aki kanu apupun yen aponi kitamasi apua. Arai abwaak acedunun aiboisit na atukere abootin kijesuna ikeperin kwap kede aiyolongong na epol. Apotu korasakisi agwetar isimun kec akaulo ajenikin ebe, apotu abootin kolungata kesi.
Kwape araar idiope itunganan bon abeit aitub, abu Jane Nangobi, ayaiton aseo kopate loka NRM kolimo Orone kwape etelekaran akaulo akakaun abootin 7,415 (42.7%). Taligola ngesi ebwapakit Orone kede abootin 5,789 (33.3%), kodetuni Mukula 2,217 (19.1%) kosodi Ourum aiurumikin kwap kede abootin 850 (4.9%) kotoma aseak 17,371 lu ajaasi okokoron ko Gogonyo.
John Opolot lo obuku Gogonyo ngesi eyalama ebe, ibecokina aseunio ke Orone naarai ebe, apotu itunga kolingakisi aisimaar aitapoeta kede aomisio ke kolosek eroko metiakuna Gogonyo kobuku Agule. Inerasi kede Aicerit, Derrick Orone ngesi abu kisialamik
Lokasuban keda aseak luko Gogonyo. “Ageun erot loka adumun akerianut kanu itunga
luko Gogonyo,” abala Orone. Karaida erumit amumu aibosio acie, Ssenyonjo Kyeyune, RDC loko Pallisa distrikt ngesi kopedo aitad lu ayuara anatar ebuku kere.
Etigogongit Kyeyune ebe, ejai ayuara aingic aduworio na arasasin kotoma aseo. Agule Kadukena nuka ekansulo ko Pallisa ne emarere abootin, eleleba aseak kanu apupun yen apotu aseak kolungata.
Kobuku Agule, abu David Ochwa kocu ipaupa ke; Charles Otai Nelson, Hebert Okello kede James Omeke, lu emielasi emendera. Kotemwan iwongon lu ejaasi Agule kaimoriarit; Agule, Chelekura, Akisim keda Kameke, arai abootin 15770 kesi atiakete imongin lu.
Abootin 8352 (53%) kesi abu Ochwa kosiikina Otai (4123), Okello (2688) kitilor Omeke atunit aseak 607 bon. “Eyalama eong ne ejaasi itunga luka Agule naarai amuno eong abongor airabet kanu angetakin akiro nu etegiarit eong aswam,” abala Ochwa.
Ekesete imongin arukai kicasitos angor da aiwen igomasin ko distrikt! Kotoma awongon nu emoriaritos; Josephine Ibaseret, Catharine Achola, Faith Alupo na ber ejai airabet, kede Kevin Kaala Ojinga, apol eidiny noi. Apotu aseak kitogoloto Alupo kede abootin 9545. Atamitos ti aremokin Achola emendera konye abu kopedo abootin 20,961 kanu araun Naiyareit. Kaala ngesi abu Nangobi kolimo kwape etelekaran kede abootin 24,193, kodapuni Ibaseret abootin 18,477 (25.3%). Elimoritai abootin nuka angor isawan iuni lu atupuruc, ibore yen abu kitukurian aseak bala ajakai aswam eede.
Inerasi ka Aicerit, Kaala ngesi abala ebe, Lokasuban ngesi edaunit asipokin kede aitutub ngesi. Eyatakit, ebe idaritos lem itunga aijaikin ngesi arereng ngin naarai ebe eitutu itunga ajokis ke. Achola na alomari NRM akaulo ajalakin FDC ngesi amunosi aseak ebe, abu kongur akwap naarai mam emisiikit apetetait nako NRM.
Ebuku Pallisa
Ebuku lo Pallisa lo ejaasi keda itemwan lu imoriaritos; Pallisa, Kamuge, Olok, Kasodo,
Puti-puti, Bolliso 1 ka Pallisa Town Council nesi abu Sam Otukol ibwoko emendera loka NRM akaulo apetokin ipaupa ke kwap. Abu kotuk abootin 13,169 kodungungite Ibrahim Aisu ngesi kede abootin 13,116. Rogers Tatambuka ngesi abu kodum abootin 10,176, Jacob Opolot Mooka MP lo obuku Pallisa ngesi abu kogol keda abootin 8,656 kotoma aseak kere 45,117.
Eyalama Otukol kobala ebe, “Aicerit, erai na arereng na Edeke kede amina na itunga luko Pallisa ne ajai eong nesi etodu aseo na.” Eyatakit ebe, mam apatana aimo abootin kwape ajaar ekedakada lo enyadu.
Ebuku Kibale
Ebuku lo Kibale lo ajaasi itemwan luko Kibale, Opwateta ka Kibale Town Council nesi abu Richard Oseku kopedo aimakakin kede abootin 8,174, akaulo apetor Lambert Okia 5,904 korai 41.9%.
Apol angurian
Karaida itelekarit Kaala aseo, Achola ka Ibaseret kesi mam ecamunitos ngun kwape abeit. Abalasi ebe, aseo kede aimario na abootin nesi mam acai cut, ibore ijaikit itunga amun ebe eminasi nu abongun abolobol kwape nuka obonipe. Aisu ediope kotoma abwaak ngesi emuarit alimorio ke Otukol. Abala ebe elosi abwa kwape obonipe kotoma aseo na ebunit. George Oule Omoding, apolon eicolong loka NRM ko Pallisa distrikt ngesi abala ebe, elosete kesi kwape epate aigang etelekarak kec luka imenderan kanu aitelekaar aseo na ekaru 2021.
