TESO – Kosabiiti lo atubor, apotu imurok luko adekis na apolon ko Soroti kopedosi airiak imu lu emakakina akaulo imurok kere luko Uganda aimen. Aiturio naka imurok luko Soroti nesi abu kirum Uganda kede aiboisio acie ko kinga. Dr. Epodoi Joseph ngesi engarenikit ekodet ngol.
Kanu aisisiaun aomisio nuka itunga kaidules, abu Aicerit kirimok kosodi adumun nuta;
Harriet Amao ngesi abala ebe, etodu aswam naka imurok kangun ebe, epol acoa ko Teso.
Eyatakinit Amao ebe, ekoto itunga luko Teso ailip ijaik bobo lo asuban Teso etunganan lo eperi etau kokinga kwape Dr Epodoi.
Ezekel Ikoo ngesi elipit apugan aijaikin Dr. Epodoi eyapesi lo epol noi ko kide nako Uganda tetere ebe, epatanikit aitolot aswam na aijeng.
Abala Ikoo ebe, akiro nu iswamaunit Epodoi kesi eraasi nu adautu aitodikin Teso ebe, erai lo etunganan lo eperi etau kokinga ido erai lo emina aswam ke ngin.
“Korai kolo itunga kere luko Teso iswamaete iboro kwape Dr epodoi aomit eong ebe, ti Teso epoloi adoketait nako Kuju,”abala Ikoo.
Eyatakit ebe, edolit Teso aitoduun apirianut na epol kwangin kanu aikeun akerianut.
“Eraasi akiro nu eswamau Dr Epodoi nu itegelikina ido oumokina kotoma aomisio ka ido itodunit ebe erai ngol emuron loda elemunit lo asuban kanu aingarakinit ateker”abala Dinah Asemo
Abala Esemo ebe ibusakinit kwana apugan aanyun ebe aboisit na atemar ebe ijukarai Epodoi Mulago ibusakinit konyangaunai iboro ngun Soroti referal hospital kwape etegeara adekis ngin atodunit aswamisio ke
James Alibet ngesi abala ebe, ekot apugan aitopolor adekis nako Soroti Regional Referar Hosiptal naarai etakanete aswamisio nu adekis kangin.
Abala ebe, edolit aiyatakin imurok lu adekis kangin kwape araunor Soroti ecity.
Eyatakinit Alibet ebe, imurok kesi ibusakinit aanyun ebe, etupete kesi ainapeta nu etegea Dr Epodoi aswam komam ipuda abola adio kere kane ejai akadekan konye mere kesi aitopolorit apiyai adekar aswam kec
“Adau Dr Epodoi aitodikin Teso ebe, mam erai Kampala bon nesi ejaasi itunga lu emisiarito keda ainapeta nu aijeng,” abala Alibet.
James Opolot ngesi abala ebe, “emamate kwana acie nu ibusakinit apugan aswam kidimarai aitopol Soroti Regional Referal Hospital kwape adekis na apolon ko Uganda korianasi ejaanakine ke keda ngin nako Mulago.”
Eyatakinit Opolot ebe, kwape adauna akwap kere aanyun ebe, ejaasi Soroti keda imurok lu epiriaka kwape kangun luko Mulago edolit iyatakinai acuman nu ejokak tetere epedorete aisibeben aswam kec.
Angella Tumisimwe nako Cross Eagles Beuty saloon ngsi abala ebe, ekot apugan aisialamikin auriak ke Dr. Epodoi kanu aurikin ateker epiriotit lu epodokit alakunun aijar naka itunga.
“Akepolou ebe adau ajaut ke Epodoi Teso aitodikin apugan ebe imurok kere eraasi lu etorete toma aitutuworo na ilesikina. Nu kwana edolit apugan aswam nes abukokin iswamaete nu ilosikina adekis nako Soroti kwape atakanuna doco ebe ejaasi acuman adekis nako Soroti regional referal hospital,” abala Tumisimwe.
Charles Edoku ngesi abala ebe, ibusakinit apugan amoun iponesio lu isiyalamikinet Dr Epodoi naarai nu eswamautu kesi kwape etiimu eraasi nu eumokina akonye nu itunga luko Teso kede Uganda kere.
Abala ebe, etodu Dr. Epodoi ebe Soroti kwape adekis nes ebusakinit aikeikin adoketait na apolon kosodete aitasalikin imurok kwape Dr Epodoi aingarenikin.
Abala ebe edisiar itunga alosenen Mulago kanu adumun amukian na ecai eipone ke.
John Robert Elangot ngesi abala ebe, etodu Dr. Epodoi ebe erai ngesi emuron lo emina aswam ke ejok ido koperi etau kokinga.
“Ikoni nen ekoto apuagan isisiau ebe, mam erai Mulaga International referal hospital nes ejaasi keda imurok lu ecobe adepar lucie, nu ibusakinit apugan aswam nes aanyun ebe eyangaun iswamaete ngun lu ejaasi Mulago toni kwape kanu aingarakin imurok luko kwap aitebeben aswam kec,” abala Elangot.
Abala ebe, edolit aijaikin imurok kere aswam epelu kec kaidules karai ejaasi iswamaeta.
Osoo Okwale ngesi abala ebe, ekot apugan aikeikin Soroti Soroti RegionalReferal Hospital araun adekis na apolon ko Kide nako Uganda koipone loaijukakin imurok lu ejokak kwape Epodoi ainapeta nu epote aitidisiar Iteso airim Kampala ebe adumun amukian ko Mulaga neda etiono ejautene adepar
“Mam erai lolo Dr Epodoi bon keda etiimu ke aiswamaun akiro nu aumokin kwape kangul ibusakinit apugan amoun eipone lo isiyalaminikina imurok ngul,” abala Osoo.
