“Mam aibiror ke Elakas kede Koluo erai aumokinet naarai ejenete itunga ne apotu kesi kopayarata kowai lo aijaanakin koyapesin kec,” abala Stephen Okello lo Omodoi. Akaulo akiro nu Elakas aitamaria lo ayuara emuudu, itunga kesi apotu kimuasi eipone lo aswam ke.
Lu ayuara kesi ejaasi aitolot aingic kanu eyarit lo abu kolom ko Kapujan. Abu amumu ngin kidupo, Teddy Akiror atwanare ko Kapujan kimusungunos; Charles Etyang, lo inomitai akoik kede Lucy Apenyo na isiarara akan. Akaulo amojong atwanare, apotu itunga lu anyunyurasi kopeleata aicwe itogoi luka itunga lu aomitos kesi ebe araasi egangitok luka abwaak lu ecukete amumu. Egangitok icie luka abwaak kesi apotu kidererata apuwa. Naemukaaga, apotu itunga kididiyaros Katakwi CPS kongurianete eipone lo mam ekisil ajar aikamun lu esidikete amumu.
Aiyeya naka iyemuto kesi ibeliaritos bala emamei bobo ailajara kane ejai Elakas. Ketam Aicerit ainomakin Elakas esimu kanu apupun nu kotau ke, mam esimu ke agwetakina. David Ongom Mudong, eraban loka Polis kari nako Kide ngesi acamunit ebe, abu atwanare kolom kotoma apak na atamitotor ipolisin kede luka UPDF aitudeng amumu na abu koduun kiding egangitok ke Walter Elakas Okiring, apolon eicolong loko Katakwi kede Andrew Joseph Koluo, MP lo Toroma. Ilobwatai ber itunga lu eomitai ebe ekodakina toma oyarit ngol, ko Katakwi Central Police Station.
Emarakit Kolou akangas ngin toma akou naka Elakas. Naesabiiti, abu Kasule Lumumba, aegirigiran na ti nako NRM kipejok Katakwi kosodi aijaanakin apiyai ne ejaasi ikalia lu ebworosi. Abu kisumunik adukokin itogoi okalia lu ebworosi. Itepegitos lucie abootin nu.
