SERERE – Karaida mam MP loko Serere pac, Patrick Okabe edaunit elap ediopet ailit na idaikitai korekec loko Serere, abwaak swi kesi akapakinos aiperikin atorobusio kwap kanu aburokin ngesi.
Imongin iwongon ka aberu adiopet, kesi kopekwana emwanikitos imakukio kirimokitos iteela 38 lu obuku loko Serere kanu aitam aiyaya itauon aseak.
Ekisil lo airabet nako Uganda, nesi ikeunit ebe ne duc etakanuuna abaagat kotoma edio ebuku, edodor aburokin akeju ke.
Kwangin egirigiran lo airabet Adolf Mwesigye, ngesi abu kitijenik erionget lo aseo ebe kwapo atwania MP Okabe, ebusanikit aburokin ngesi katipet.
Akaulo na adumun aisiiraret kane ejai airabet, ecaman lo orionget loka aseo, ngesi abu okukokin okalaamu kosodi aipirun ainapeta nu ebeit atupakite kanu aburokin abaagat na ejai obuku loko Serere.
Kanukangun aseo nesi ebeit aitolot eraasi 23.02.2023, aseeta nepetai 138 nu isiarakina obuku loko Serere.
Osawa lo idoyo okalaamu, apaaran na edaere MP Okabe, ka aberu ke, MP lo obuku loko Kasilo, Elijah Okupa, ngesi abu kobwang etuo kelimor ebe koburok Emmanuel Omoding lo ber ajai akwap nako Australia papake tetere engetakini ainapeta nu pac etolosi papake aimoriarite edistrikta loko Serere kere.
Okupa ngesi apotu engarenok lutiok apugan kigangata aomisio ke aimoriarite atupiton aeraban, airabet, Thomas Tayebwa, eminista lo akiro nuko Teso, Kenneth Ongalo, Musa Ecweru, ido lu ipu kakesi abalasi ebe ti Omoding elomu komam itunganan idio yeni itepegit.
Ebala Ekisil loka NRM ai?
Ekisil loka NRM, nesi itogogongit ebe duc ne elomuna adio abaagat, toma oingarenikine edis kojai lo itingit emendera ngesi elomuni kwapo lo ebwoi.
Konye ko Teso, mam bala akiro ngun etupakitai, kilema Andrew Kolou bon lo abu apugan ka NRM igang okaru 2017 etwana Cyrus Amodoi lo arai MP loko Toroma.
Okaru 2012, epate loka NRM nesi abu kojal aigang Charles Oleny lo adakit emendera loka NRM, lo ti abeit aburokin Micheal Oromait lo abu kotwana korai MP lo obuku loko Usuk.
Oromait ngesi abu akooke Proscovia Alengot koburok, ido na kwapa erai atupiton ke President Museveni, Jessica Alupo Epel ngesi engarakit Alengot.
Ngupongun kesi eswamaunos kobuku Serere naarai angeroki bala epate Philip Oucor, lo pac arai lo adakit amendera nako NRM karaida ipuda abolobol.
Pac ne alimorere ebe kingarakinai Omoding, Oucor lo aponi kocamakinai einer apaaran ngin, ngesi abala ebe mam ngesi ber ajai akirosinei nu aisup aseeta konye ebe ajai ngesi elopet eibworo.
Karaida ilalai Oucor kanu ebe ekalamata ngesi luko NRM, adomia acie kesi ijekosi opura ke kanu amariaun emugaati ngon.
Lu icie kesi; Emmanuel Eratu, Alice Alaso ka Martin Onguruco.
Kilema, Omoding okooke Okabe, Oucor, Eratu, Onguruco ka Alaso kere kesi mam itetiak kowai loka politikis ko Serere.
ALice Alaso Asianut
Mam ekiror ke Alaso itet kotoma aki nu aseak nuko Serere ka Teso.
Erai Alaso akukuleru naka politiks ido ipugator edistrikta loko Soroti komam etiakaritai Serere ka Kaberamaido.
Ebwoikitor edistrikta loko Serere irwanaarei kotoma opate loka FDC, konye icaki 2016, abu aminista Hellen Adoa, kidedia ngesi kwapo MP na kangina. Karaida etamaki abongun opate loka ANT, mam akiro apotu kojokukata idediar bobo ngesi.
Konye inerasi keda apapula na Aicerit Naiyareit, Alaso, ngesi ekuna ebe abongu ngesi oisawe tetere ikaru iuni lu ideaun mam icanicanaaros.
Abala ebe erai ngesi akukuleru na etionit na mam ekoto aipudisao naarai ariongit lem ngesi ajokot pac.
“Karai edekakin ijo emong karai etwana, ilot ijo aujo arai osokooni, anibo emong ilemuni ijo mere lo ejeni aswam araibo lo enyamit ajokot emorising?” engisit Alaso.
Abala ebe kwape ngesi na ejeni agorieik, ekot ijukarai ngesi kanu angetanakin ainapeta nu mam ngesi engetakit. Kobala ebe erai ngesi eporoto lo airabet mere na ocaaloi.
Abala ebe ekot ikiliok lu ineketos eicolong ngon aijal naarai ideleleete ngesi aiwadikaeta ido epatanikini ngesi aijaanakin itemwan iwongon lu obuku loko Serere ka itaun kansols iyarei.
Kingitar ngesi arai mam ekuriana aturubanga ka ikatiok luko NRM, abala ebe, “Karai ekurianara Daudi aremokin Goliath aipongorut ti mam isipikoorit.” Kwangin arai eong Daudi na akapakina aremokin lu elangir luko NRM aipongorut.
Apolouke ebe bobo kangin ibore yeni esomai eong kere, ejaikit eong akanin Kalokasuban.
“Ne ilomaria ijo aswam idio ibore kere, mam ikurianar lu asurup luta iyarei; akurian ka amamut keda amuno. Ekot ijo ajaut ka atiting ka amuno tetere ipedori idio ibore kere,” abala Alaso.
Abala ebe iiritor ngesi aibironor aseo konye mam ngesi amuno elemara. Kanu airim opatei abala ngesi ebe ajai ngesi pac FDC, ido kwana ejai ngesi opate loka ANT ido eraasi ngun nu atuboros.
Emmanuel Eratu
Karaida ewoi ebe mam bobo ebongori akiro nu akwap, Emmanuel Eratu, ngesi bala abil ekoona elimor ebe adau alemun etau aketar eicolong kwape MP loko obuku Serere.
Eratu lo elomunit ko Acilo, koitela Alengo, kotem Atiira, kodistrikta loko Serere, ngesi ikekema ebe adol apak na itunga luko Serere mam acakanar abootin ne ejaasi engarenok lu mam epodokitos kesi.
Erai okooke apolon Eric Okiror lo ejena kwape ‘Esawa lo Emoyo,’ ido abu okwac asioman ke ko Atiira PS, kolosi, Polis Childrens School ne akwacuna abalua naka PLE.
Edau nen abu kinyikok asioman ke osomero loko Old Kampala SS, kobili ekoona abongun Soroti SS ne eboikinor S.4.
Kidoroki asioman kodoco abu kolot Soroti Central SS ne akakauna apupula naka S.6, kolosi Nsamizi Training Institute kosodi angedun ediploma lo (SWASA), ape kolomari Makerere Unibasite ne elokuna edigiri lo apol (Devt Studies), kogeuni bodo aisulul amoru ke nu ikososinei kwape nat; Arrow Boys, Einono, ka icie.
Ikilikila ebe kotoma aiboi ka asioman ke akwapin nuka Imusugun, abu isisiau iboro swi kanoinoi nu ikamanara kede aijar na atumunak.
“Abu eong esisiau ebe ikoku yen engetakit asioman atukot nako S.6 ko Bulaya kitiiriani ka luok luko Uganda, ajai atiaket na epol noi. Ngun kesi akiro apotu ejaikisi eong abongun aitegear akirosinei swi nu aigang ejautene lo itunga kere luko Serere,” abala Eratu.
