SOROTI – Idopit Soroti distrikt kwape epurio airabet nako Uganda! Ikansilan kesi itereikina k’ainingosit ati na apietun eraban lo ebuni aisa ekansulo kitoni 2026. Stephen Olebe, 38, (NRM) kede Bob Owiny, 30, (NRM) kesi inyinyiritos adapit emakuk ngol.
Erai Olebe eraban kokansulo lo ejai angetakin kolap loikanyet, kodapakina Owiny kwape atupiton. Arai ber Owiny abwoikiton atumunak korai Olebe abwoikiton ingwalasik.
Lolo kana ebwoikit Owiny etem Tubur kosalakite Olebe abwoikit ingwalasik.
Inyo emina aikekeun kesi?
Imemban 29 kesi ebeit atiakun ‘imongin’ lu. Angor 12 kede ikiliok 17 kesi ejaasi okansulo lo itet ido atumunak kesi ipu kokansulo, ibore itukurianit lu ipu ebe, emina Owiny lo erai atumunan aipunupunora Olebe.
“Epote atumunak akotokin etunganan lo ekusiarit kanu aisa kesi. Ajatar eong kede agangat na 60% kane ejaasi ikansilan lu ebwoikitos ingwalasik, ipolok kede atumunak,” akudiani Olebe.
Owiny ngesi abala ebe, ekoto atumunak asekun atumunan lo emisiikit aisa kesi kodoco.
“Karai ber apedorit eong aingarenikit ekansulo kwape atupiton eraban, inyo bodo isukurori eong aisa kwape eraban. Ejai lolo arereng akanin nuka atumunak,” abala Owiny.
Abala Owiny ebe, ebuni ngesi asipokin ainapeta nu aitutuonor ikansilan kede ofisas lu apugan kanu aisikapikin kesi aswam ejok akaulo na aisilairao.
Eyatakit ebe, ayanganar ikansilan aipejonokin aiboisio acie kaimoriarit airabet kanu aisikapikin ka acobeu na ikeuni aijaanakin ko Soroti nesi ebuni ngesi aitodolikin kesekun araun eraban.
“Abuni eong aitemonokin iponesio lu arucokit ikansilan kede aseak kec,” esumunikit Owiny.
Konye Olebe ngesi abala ebe, ebwoit ngesi kanu ayuar angosibib na ekansulo kane ejaasi itunga.
Arai Olebe atupiton eraban okaru 2011 eroko erauna eraban okaru 2016, ibore abala Owiny ebe, erai lolo na apak ke na aikunyakin kuju.
Kingit Aicerit Olebe ibore mam ecamunitor aikopakin Owiny emakuk, abala ebe, mam ngesi ecamunit ajalakin aputo naka ekansulo etwalatwalao.
Abala Owiny ebe, apirianut ke na aijaanakin kwape atupiton Head Prefect k’Osinia, eraban kokansulo loka Guild ko Kyambogo Unibasite, engarenon loka asiomak ko NRM okaru 2010-2011, nesi eposik kanu aisa ekansulo.
Engicunit Aicerit ebe, kokaru 2018-2019, arai Owiny Guild President ko UCC kingarenikite UDICOSA na ingarenikit erabak luka ikansulon ko kide nako Uganda.
Erai Olebe euriat lo kotem Arapai ido Owiny ngesi elomunit kotem Tubur. Ejaasi itemwan ngul kere obuku Dakabela.
Eraasi Olebe kede Owiny luko NRM. Ajai ber Olebe UPC. Imemban 21 kokansulo lo itet kesi elomunitos ko NRM, FDC (4), UPC (2) kede obonipe (2). Imemban 20 kesi itetiak kokansulo ido 9 kesi ajaasi okansulo lo ejai angetakin.
Yen enonok ko NRM ngesi emina aipet ekomio kwape erokor ber epate ibeliara ‘eminat’ ke.
“Ejatar Owiny ka aliasio NRM aitelekar Olebe naarai ayapiei nape asukoror ngesi ko UPC. Emina bobo ngesi atwaniar abootin nuko UPC da kanu aibwot ke,” abala Stella Okwi nako Gweri.
Abala Olebe, ebe adau NRM amisiikin aidules ke ido ebe, mam UPC enyunyura kanu anyoun ke naarai eriagi bon ijulakit ngesi mere aomisio.
Kotoma aseo naka eraban okaru 2016, abu Olebe lo ajai UPC kipunupun John Enomu (FDC), Susan Apolot (NRM) kede Jorem Opian (NRM) akaulo adumun abootin 13. Abu Enomu kede Apolot kodum kangin idiope abootin 4, kiraruni Opian abootin auni.
Kanu atupiton eraban, Vicky Iruo na ebwoikit atumunak ngesi abu Owiny kitamat apuwa okaru 2016. Abu Owiny kotuk abootin 14 konyiluni Iruo 7 bon. Abala Owiny ebe,
“Karai iteleka Owiny eong kotoma abolobol naka epate. Apalari eong aibwo,” abala Olebe, kiyatakite ebe, ejai Simon Edoru, apolon eicolong loka LC5 loseuna opura ke.
“Egangit eong Edoru aisup aseeta ido erai ber ngin abooti ka,” abala Olebe.
Acamunit Owiny ebe, mam ngesi egangit Edoru aisup aseeta konye ebe, adaunos nu aseo ido erai kwana aite ingaren kanu aimedaikin itunga.
Abwoetait na apiyai!
Epol itunga akurianu bala eminasi apiyai aigurokin ikansilan akwes.
“Yen idoelel eisao ngesi emina aimat emase. Erono konye karai emamei abaran kopura loka abwaan,” abala asean ediope.
Kanu apiyai, abala Olebe ebe, emamete ngesi apiyai konye ilipi ngesi Lokasuban aisirereng ngesi.
“Karaida emamete apiyai konye epol kwana eong amuno bala ebuni emakuk ngol akanin ka. Karaida etamitos lu asurup ka aitwasam aisab kanu atwalatwal ekiror ka, Lokasuban ejeni abeit,” abala Owiny.
Owiny kede Olebe kesi imaritos aimorikikin ekansulo kanu itunga aimedaun kwape aitapoet kec.
Asioman
Ejatar Olebe ka edipoloma loka Social Works, edipoloma loka electronics, Certificate na ekisil, Certificate naka Public Administration. Owiny ngesi edumunit ediguri loka Science Technology ko Kyambogo Unibasite, edipoloma loka records kede Information Management, Certificate naka Business Administration kede Certificate naka ekisil.
Arai itojokasi ikansilan akotokin etunganan lo esiomarit noi, emina Owiny aidip Olebe.
Inyo aitapoeta kec!
Owiny lo eroko erai egirigiran lo ti loka National Youth Forum ko Uganda ngesi abala ebe, ekoto ngesi aitwasam arereng ke na arucokina, asioman kede apirianut kotoma aijaanakin kanu akodakina ekansulo loko Soroti kede ipadic lu egelegela.
“Ajatar eong ka akusiarit na ailipanar kanu itunga ido akupup eong kanu aimedaikin ekansulo loko Soroti,” abala Owiny, kiyatakite ebe, “Abu aisa ka ekansulo kouru Soroti City.”
