KAPELEBYONG– RDC loko Kapelebyong, Kyeyune Ssenyonjo ngesi etolomuni aicorakinet na kosabiiti lo atubor.
Iswamauna ngun akaulo itunga acelun ebe, mam imucugai cut epedorete aigangakin naarai ebe, emamei emucuuga lo apedo aijar ko Kapelebyong ageun ne acopere aikor ikaru lu ipu kokau.
Ayaitok nuka akoru ko Kapelebyong kesi etaunitos ebe, mam kesi da ikuklepek ilipitos imucuugai aremuno ne ejaasi itunga naarai ebe, mam epedori aijar ko Kapelebyong ne emina eibulone ainginy kotupakini bobo akolong da aipe apaarasia nu akamu.
Kotoma apak na alimoro Kyeyune eporoto lo, adaunitos ber itemwan icie adumun imucuugai.
Acinga, Obalanga kede Alito kesi adaunitos adumun imucuugai, kwape egiparitor Aicerit kotoma olago loka edistrikt loko Kapelebyong.
Airetun ke Kyeyune nesi abu kotwaru aiyalama kane ejaasi itunga lu abalasi ebe, ‘iyapit ber RDC da.”
Apapulai nu ewanyunit Aicerit kolago loko Kapalebyong nu ajaikina Teddy Ajom Kamende, na abwoikit apolon eicolong loka LC5, David Ebulu, (PAS), john William Ejiet, apolokiton nu akoru kede aipit ko distrikt, Justine Eilor, apolokiton Operation Wealth Creation kede icie da kesi etacaunitos ebe, adautu akiro aidol oyapesi loka apolokiton OWC kari nako Teso.
Kotoma aiwadikaet kangin, ikeunitos engarenok ebe, aipit; ipegei, ao, akokorei kesi iboro lu epedorete ajakun Kapelebyong kotoma obakor.
Kowai lo ikorion ekeunit aiwadikaet, ekirididi, emaroge, imare, soya beans, emaido kede emwogo kwape iboro lu edolit aikor ikinyom kec kanu ajakun kesi kotoma obakor.
Kyeyune ngesi abala ebe, edolit apupokin aimony naka itunga kosodi apugan aitodolikin ainapetan nu aitemokin aimony ngin.
“Mam eong akoto itunga aite bala ijai isio aitiji ainapeta nu apugan. Ijai isio aikwenyakin apugan ebe, edolit aijukun iboro lu ipudasi itunga ikulepek akaulo angicun ebe, ejok kanukec,” abala Kyeyune.
Mam erai Kapelebyong emonyi ko Teso ebe, mam imucuugai epedoritos apucun kesi kobakor karaida ejai Soroti Fruit Factory.
Ipiriotin kesi abalasi ebe, edolit ainyakakin Teso aipit akituk naarai nen nesi kolo aperio abar na idwe Oduk.
“Mam konye emucuuga erai eraasit lo itabari Teso da. Atuboros ikaru konye emamei ibore ejai emucuuga aijulakin ko Teso. Edolit kwana aijaikin itunga iboro lu etakani ameda,” abala Simon Okello lo Okungur. Imuaritos lu ipu akorio na imucuugai.
