AMURIA – Eripoota lo elacunit National Forum of People Living with HIV Networks ko Uganda (NAFOPHANU), nesiibeliarit ebe atenut na angaleu kodistrikta loka Amuria nesi etereikina ka ekadakada lo iboro lu ipu. Imarunit eripoota lo ekadakada lo eswamak ka itogoi lu eswamak, amamus na abiolosin nu itolosere adekak, amamus na iwoodin, ekadakada lo ikee ka icie da.
Alacuni erionget lo akiro nu kotoma aurianet na ajaasi engarenok lu edistrikta ka itunga lu alomunitos kodistriktan lu Amuria ka Kapelebyong na ajaikina ko Amuria Town Council. Elomunit eripoota lo kotupitete airimor aingic na abu erionget ngol kitolot kotoma adekisia auni nu Amuria kimoriaritos Amuria Hospital, Orungo H/C III ka St. Clare Orungo H/C III.
Stella Kentutsi, na epolokit erionget loka NAFOPHANU elacuni eripoota ngol, ngesi abala ebe etamitos eswamak lu angaleu aitolot epelu kec konye ekadakada lo ejai nesi erai ationis. Kanu aikeun adoketait na aijanakin ko orionget lo angaleu ko Amuria, abala Kentutsi ebe ipudasi adekisia aiyatakinio eswamak icie, itogoi lu imurok, iwoodin, akipi nu eyuara, abiolosin ka icie da.
Abu kikeu Orungo H/C III kwape na ipuda akipi nu eyuara, aiyatakinio imurok 5 kosodi Amuria Hospital kwape na ekoto aiyatakino imurok lu edeparete 10. Koiner ke abala ebe ekadakada lo amookolia nesi epol noi, ibore da yen ekoto apugan kireik. Francis Opolot, CAO lo Amuria ngesi ecamunit ebe ejaasi edistrikta ka ekadakada lo epol noi kowai lo angaleu. “Itamit isio ailip apugan aikeun apiyai nu ijukakino Amuria tetere etamio aitemonokin atiokisio acie, ido iroko ber idarit abongokinet”, abala Opolot.
Moses Emabu, atupiton LC 5, lo Amuria ngesi abala ebe ikedesiarit apugan apiyai nu ijukanakino edistrikta, ido ebe ibore ngin einakit ejanakine ijesuna kwap cut.
Pac iripootan kesi ebeliaritos ebe icodo eijaanakine lo adekisia nuka Amuria ka Kapelebyong ido elipitos ikodena ka apugan aingarakin itunga luko Amuria ka Teso aitam akutun kesi kotoma obakor lu eroikitos kesi. Uganda ka Teso kesi imokococ eipone lo amukian karaida etamit apugan autaara kanu itunga.
