PALLISA – Erai Politiks abolia na modok! Itunga luko Pallisa kesi ejenete
aidules na akiro kangun. Itunga lu edeparete 40 kangina kesi eroko idediasi k’adekis na apolon nako Pallisa.
Lu kesi imadete aromwa akaulo ejie eti abwangun kotem Apopong k’apaaran na aseo kanuka icaloi 54 lu abu eyaitene loka epate lo NRM kicorak abongokin aseo akaulo abwaak aidulokin akoko aseeta.
Apotu ngun kiswamaunos akaulo eyaitene loka epate aimen alimor etelekaran lo emendera loka LC5 kodistrikta kotupitete aseo na aponi kitolotoi eraasi 11.09.2020, ibore abu kijaik aseo abongokino eraasi 17.09.20202.
Nen da tai, tupuruc ne abongokinere aseo apotu itunga 40 luka David Kedi Apua, ediope kotoma abolobolok kanu emendera lo efaif, komata emase.
Ebalai ebe egangitok ke, Joseph Okoboi Opolot kesi apotu oduikinos k’aibosio nu egelegela nu asekere itoronitos kesi kanu aigangit Apua.
Imoriaritos lu ijekosi k’adekis; Martine Ochan, Lazarous Obuge, Charles
Arikodi, Stephen Okurut, John Okello, John Oumo, Simon Omoding, Charles
Aisu, Nicholas Obuin, John Opolot ka ipaupa kec 30.
Martin Ochan ediope adekan ngesi abala ebe, ajai ngesi aiboisit na Obwanai ne asekere konye itumoro ngesi einer kosiimu opupuni ngesi ebela edipi epur ke.
“Itunga ka, alosit eong kwape aibwoikiton ke Apua aseo naka LC5 konye nepe ejauni eong esimu oduikinos itunga ke ejakait Okoboi aibunga eong ka abotet ido kwape araar eong ediope bon, abu ebela konyam eong ido amamei yen adiekuni eong cut,” amonyi Ochan lo ekajakitai akipi k’adekis.
John Okello, araman aseeta kunuka David Apua ngesi ediope kotoma itunga lu ijekosi adekis kobala ebe asubit bala akapakina kwi aicutar ngesi.
“Akapakina kwi aicutar eong naarai apotu kwi omiedata eong iporotoi ka airi itou, ibore apupi eong erono noi ido mam ajeni arai apedori abongokin aswam na ojamu kwape lem sek,” akudiani OKello.
www.aicerit.co.ug
Charles Arikodi ngesi elairai ebe, “mam bobo ngesi ekoto akiro nuka aseo cut.” Lazarous Obuge ediope kalu ibungatai ngesi amonyi ebe, eroko akiro nu alomakin toma aseo cut naarai awanyutu kesi ican keda aromwa nu mam abololok iyiritos.
David Kedi Apua lo ibungatai abwoikitok ke ngesi abu kolimoki Aicerit ebe “mam ejok engarenok aidulokin toma kotoma akiro nu amumu naarai erai lokasuban esekuni engarenok,” abala amumu naarai itoduni amamus aica arai iinakisi itunga apugan.
“Ibore iswamauna apaaran ngin Apopong nesi erai nu aiturur noi apupun ebe ikaitunga 40 kesi aponi kodumarai aseeta nu egelegele kosodete akwamakin aromwa akoto ailip itunga lu Apopong ka abolobolok alemar kotoma akiro nu amumu naarai erai lokasuban esekuni engarenok,” abala Apua.
Konye Okoboi Opolot lo itoronitai ngesi imuarit ngun kere kobala ebe,
mam ngesi ejeni akiro nu ikamanara ka ejie ngon kobala ebe, mam nesi
kwape engarenon epedori aicorakin itunga aibunga lucie naarai eraasi itunga kere luko Pallisa aseak.
Derrick Orone lo edakit emendera loka NRM obuku Gogogonyo ngesi abu kitoron aibungao na abwoikinitok kobala ebe erai ibore yen erono noi
idio itunganan aswam amumu kotoma aseo.
Epolisit lo mam akoto ikiroria ke alimoro ngesi abala ebe, ecorakisi kesi
itunga lu ibungatai kere adumun ber amukian do konye itegiario aipup
awosan kec.
Karaida imadete itunga aromwa k’adekis, konye atibong Naiwongonet
nesi abu aiyalama kiriamia Pallisa distrikt akaulo ne aponi kolimorere Patrick Ducu kwape etelekaran loka amendera loko NRM kanuka LC5 akaulo akakaun aseeta 39,083 (29.8% ).
Jane Nangobi na eyait nu aseo opate loka NRM kodistrikt, elacuni eripota
ke ngesi abala ebe, abu John Michael Okurut kodum aseeta 27,086 (20%), Joseph Okoboi Opolot 27,227 (20.1%), David Apua Kedi 25,848 (19%) kosodi Louis Opange acedun aseeta 16,498 (12.2%) Karaida ejai Patrick Ducu ainunum kanu aitelekar aseo konye ejie nesi asub bala ageun do ageun akaulo ipaup ke kere akerit oyapiesi lo eyaitere nuka aseo alemun afoomun kanu abwa kwape lu obonipe.
John Michael Okurut nesi Abu olimoki Aicerit ebe mam aseo ngin acae cut ido apol amumu ka akoko.
