KATAKWI – Erai epelu loka itunga kere aitanang amumu kotoma aiboisio kere kaimoriarit okalia. Ko Katakwi Naikanyet, apotu akiro kijulakinos akaulo ipolisin aicimun angor 40 nu ediyaete kanu akiro nu aitanang amumu.
Adakitos angor acie, apapulai nu ewadikatai ebe, ‘ilosi isio kanu aitanang atubutubio na ikito’, ‘ilosi isio kanu aitanang aisiolio na idwe’, ilosi isio kanu ayuar isuban Edeke.’
Ediyaete korotin luko Katakwi Taun, eroko ipolisin elemuna acoa na airiebokin kesi. Egeuna aidiya ngin isawan iwongon lu atupuruc ido okodakina kede ainumunun apaarasia 16 nu einer akiro nu ikamunitos aitoronario na abilibilio naka ikisila kane ejaasi itunga.
Nape eyapikinete kesi alomar adukena nu edistrikt, kitobwounete ipolisin kesi naarai ebe, mam atupitai ikisila kotoma aidiya kec naarai ebe, mam atupitos aicorakineta nu aitikitik adeka naka ekorona.
Arai erionget loka Action Aid nesi etemokit ainapeta ngun ido angor kesi epu kotoma aidiya. Inerasi ka Aicerit, abu Teddy Akwi, kongurian ebe, adiakarit polis aitobwoun kesi ejaasi aitodiar apedorosio kec kanoi noi kotoma akiro nu aitikitik apotinikino na idwe lu ipesur ka abilibilio naka apedorosio nuka itunga.
Karaida itodunitos aputosio ebe, apukoritos icie itunga lu ediyaete aitiban nu ikumes, konye abala Akwi ebe, anapitos kesi lu ipu.
Benjamin Tukei, apolokiton ainapeta nuka Action Aid ko Katakwi ngesi abala ebe, acamakit eministri lo angaleu itunga lu mam edeparete 200 aidiya ido ebe, erai aumokin aitobwoun kesi lu araasi 40 bon ido bobo kotupitos nu igerokit eministri lo angaleu kotoma aidiya.
Abala Tukei ebe, edumunenei Action Aid nepetai imusaagon ikany lu amumu na kokalia kangin paaran ido ngun kesi iboro ekotosi kesi kitemokinai kwape ejaatar kotoma apapulai nu adakitos kesi idiyaete alosit adukena nuka edistritk.
Apolokiton ipolisin ko Katakwi, David Ndaula ngesi abala ebe, arai aidiya ngin na mam atupakit ekisil ido ebe atutubet kanu angor nu ediyaete kesi mam anapitos aitiban nuka okumes.
Eyatakit ebe, mam bobo ekodet lo ediyae apodokit alanakin kanu aitikitik adeka na ekorona kwape icorakitor erionget lo angeleu.
Abu kiman lu etemonokinete ainepata nu aidiya komam ikwenyakitos ipolisin ebe, mam ekisil ebuni aiteikit kesi iswamete iboro lu ebilitos aicorakineta nu apugan.
Mam na erai nasodit airibokin itunga luko Katakwi kotoma aidiya kanu apedorosio kec.
Okaru 2018, abu eigur kirukum Katakwi akaulo aitolitol itunga lu angurianete kanu aikeikina na esolo lo elago (OTT).
Esupak abootin kaiboisio acie da ko Uganda esi ekami kanu atukonokin itunga isupete aseeta.
