KAMPALA – Aiturur nesi kiding kware Naesabiiti araasi 19.09.2020, abu kirum Kampala akaulo akim aidupudup aduketait na apolon nako Makerere Unibasite.
Ipolisin kesi abalasi ebe, akaulo adumun akiro ngun, abu ekodet lo epolokit nu aitudeng akim ko polis kiderer alosit ayuun kede aitikitik anyalatoi na akim kangin. Inerasi ka arotak iyemuto Naesabiiti, Owoyesigyire, atupiton eraban loka polis ko Kampala Metropolitan ngesi abala ebe, “emunoi bala abu akim kogeu ainepun ko kuju atunyuru ka aterar oyapesin lu ejaasi aiwadikaeta ka lu apiyai, aidupudup iboro swi.”
Eyatakit ebe, ejai polis aitolot aingic kanu ajenun esusut lo akim kangin. Erai aduun na akim k’aduketait na Ivory Tower, ibore yen ajalaki itunga luipu itururuete ido kobuonokinos.
“Erai na ainingosit na epol ido mam epatana isio aite kwangin!” abala aiwadikaet na abu eunibasite kocakak olago. Elipitos itunga aigang esomero kede ailipasinei kanu ainingosit na adoiki esomero.
Mam ber ecai esusut lo akim. Isawan 10 lu atupuruc k’apaaran Naesabiiti, abu aitam aisimik akim aikopakin adukena acie nesi abu kiguik naarai anyalatoi akim noi.
Enyamit akim eyapesi loka Prof Nawangwe kede adukena nu ejaasi iyapesin kede apapulai nu asiomak. “Erai aiturur na epol noi naarai edupuduporos aiwadikaeta nu eunisabiti nuipu,” abala ediope asioman loko Makerere.
Kotoma olago, abala Prof Barnabas Nawangwe, atupiton Unibasite Chancellor, ebe, “Kibuni ainyakakin aduketait ngin. Erai apaaran na etasuro ko Makerere. Abu aduketait kosi na eposik ikam akim ido mam epatana acamun engeso lo atwarun.”
Ageunet na aduketait
Imilia lem aduketait kwape ikilautotor Imusugun. Erai lem aduketait ngin ereet loka Makerere Unibasite adaun ikaru luipu noi. Kotoma aiwadikaeta nu Imusugun, edukunitai aduketait ngin k’apiyai nuka Colonial Development bourse konye aponi kiyapai angetakin kotupitete ekadakada lo apiyai.
Abu ekadakada ngol kisiyap agwelio na iboro lu dukes etogo ngol kwape aroikitotor Britain ka ipadica ke apesenin nuka ejie loiyareit lo akwap kere.
Kanu kangun, icie iboro aria aikeunun kotoma aiboisit na etolosere aduko k;osomero lo etatai. Engetakinitai aduko ngin okaru 1941 kotoma oyaitone ke George C. Turner, ePrincipal loko Makerere College kidding ekaru 1939 ka 1946.
Ageunet na ekaru 1938, abu loti loko Gloucester lo abwoikit ekabaka George VI, kogeik aijesakin abwoetait na aduketait kangin eraasi 3.11.1938. Abala President Museveni ebe, ejalijal ngesi aticiepak erai esusut lo akim kangin.
