BUKEDEA-Anyoun ne apotu Ikuristaayon ogoluniatar Ekimat, Moses Emorut inga na ekanisa, kana esabiiti lo atubor, eigur nesi eroko elosi akonye kiding ekimat Moses Emorut (lo irusitai) keda eyaitene lo ekanisa kanu amaria aswam.
Ineras keda Aicerit eraasi 19.10.2021, Emorut ngesi abu komonyia Ekimat Peter James Okiror, kanu ajaut kau na akiro nu agolunere ngesi kinga karaida edaunit Aanyanaret nako Kumi acamakin ngesi aswam Bukedea anyoun kolap Loikanyetape.
“Emika Ekimat lo ejai aicokis eong aswam anyoun kolap Loikanyetape, mam da anyami eropit ka. Emik eong adokar otut alimonokin eijiri. Dobodo eong aijar biai?” akudiani Emorut, kobala ebe apas ngesi aiboi kore.
Kotoma aomisio ke Emorut, itacaunit ebe, kwa ejatatar Archdeacon Okiror keda adeka naka etau, adolit ber kiyengu ido konye ngesi lo eroko egogong ber aikopar aswam.
Emonyia Emorut Ikuristaayon da luko Kide kanu araut lu egongara osiep ediope, aigur keda aloger eswamak Edeke.
Ebala ebe, kapaaran kangin, apotu itunga lu apupete eporoto ke Ekimet Okiror kigooto ikekia kere aimikar ngesi alomar okanisa.
“Konye ekoto kesi kocakasi atiaktiak itunga lu eraasi eswamak Edeke. Isio kere idumunt aitutorio na eriana. Inyo eseere ikur kobaale?” acela Emorut.
Itacaunit ebe erai ngesi Ekimat lo aurikinitai Bukedea ido ejeni ngesi akiro nu ore.
Kejangaun da, Emorut ngesi eketakina ebe, abuni alosit akonye awanyun ebe, elomari ngesi okanisa ngol aswam naarai erai ngesi lo edaunit Aanyanaret aicorakin aswam Bukedea.
Konye Archdeacon Rev. Peter James Okiror, lo ejai aicokis na ineket Emurot ngesi abala ebe, emamei ngesi ationis keda Ekimat Emorut kilema keda itunga luko Bukedea.
Itacaunit Okiror ebe, abu ngesi kowanyunite abaluwa na ijukunitor Aanyanaret Ekimat Emorut aswam konye apotu Ikurustaayon ikulepek ogirokisi aijulunio ke kanu naarai ebe, ejai kesi akurianu bala erai lo itosomai ajokit keda abilai.
“Ingai bolo Ekimat lo ekoto ainang egumu keda Ikuristayon lo? Aponi kirutai kokanisa lo Kaloko nesi akotor bobo ejie keda ikuristayon, aibodo ejai araito naka emoyo?” abuonokin ekimat Okiror.
Etacaunit ebe, iponesio ke Ekimat Emorut lu amositoi kesi ngupongul ainakini kolo Bishop Irigei aitobwoun ngesi k’aswam.
Eyatakit ebe, abu Bukedea kogirunia ikapun ke aijukanar Aanyanaret kanu agirokinotor akiro nu aisiboikin Okunya kwape Ebishop ido ebe, apotu itunga konyunyurikinos keda aigir aijulunio Ekimat Emorut naarai ebe, mam eupas keda kesi kotoma aomisio ido ebe, kolimitete kotoma akiro nuka ecudet.
Konye abu Emurut kogir kere kobala ebe, mam ngesi erai acudan edio ido emamei ngesi abila adiod a koreke
“Ejai eong da akuriau ebe, esubit bala adautu lu adukokin abila acie otuti loka ekanisa kitosomaete apedor acie naarai inyo ber imikitere eong alomar toma okanisa awear akiro nuka Edeke?” engisit Emorut da.
Kingisi ngesi akiro nu mam ngesi aiswamanara ejok keda aisiboikinio ke Okunya kwape Ebishop, abu kitacau ebe, emamei ngesi apedor adio na ikamanara keda aisiboikin Ebishop.
“Okunya keda eong irai imakio, emamei eong apedor adio aimikar ngesi alomar oicolong ke,” abala Emorut.
Konye Stepehne Okwakol, ediope lo eyait ainapeta nuka apol naka ekanisa ngesi abala ebe, ekot kojalakinai Edeke elope kijesun Bukedea.
“Eong kwape Okwakol, apotu kejukasi akiro kere mama ejia polis na Bukedea kanu aingarkinio” ekidioko Okwakol akiro inera.
Konye lo eyait ipolisin ko Bukedea Charles Denaya ngesi bon abu kitogogong ebe edumunitos kesi akiro ngun ido eroko aingic elosi akonye.
