TESO – Engarenok lu akwapin nuko kinga kesi eturoto atupiton ke President Museveni. Rtd Maj. Jessica Alupo Epel kanu iriorosinei ke lu itodiaritos adicane loko Uganda ka kesi kotoma apejosia nu pac etolot nesi akwapin swii.
Alupo ngesi lem enasit tii kwabo emamei kotoma akwap wok neda ajar lem ngesi eporitoi akwapin kanu abwoikin loapolon ke President Yoweri Museveni kotoma aurianeta nu ipu ido President Museveni ngesi ituro ka apoga noi kanu aswam ke Alupo naarai ebe mam isurumitor nges ileic kotoma osapaalin ke.
Eraasi 29.8.2020, Alupo ngesi apororit akwap nako Isirael kanu aitolomun esisiak 250 luko Uganda lusek ajaasi asioman akirosia nu apiirianut na akoru.
Esisiak lu kesi icie kotoma esisiak 1000 lu alomunitos akwapin nu egitigita imoriaritos Togo, United Kingdom, Asia, Philipines, Cambodia, Tanzania, Ghana ka Rwanda ido keere aponi kitolomunai apaki kangin kneeda araar Alupo apejonon na angosibib karaida ajaasi engarenok lutiek akwapin acie.
Ainapeta nu aitutuonor esisiak akirosia nu akoru kesi abu akwap wok nepepe ka Israel idokoto akanin agear kokaru 2013 ido etolomutu kwana ipiriotin nepetai 1500 luko Uganda.
Karaida isumunit Alupo ebe elosi Uganda ainyikokit aiswamanara nepepe ka apugan na akwap nako Israel kanu aitolom ipiriotin lu akoru, abu kisialamik noi Tamir Yaron lo epolokit aitutuonoro na akoriok kanu aswam ken a ejok noi.
Eminisita lo eyait nu akoru ka apolo nakokwap kotoma akwap nako Israel, Oded Forer, ngesi abu iitu noi Alupo kanu aswam ke ka apesikin edicane kidin akwap keck a Uganda neda kwana itolosioto kesi aitutuonor na esisiak akirosia nu akoru ka apol.
Akaulo kangin, Alupo ngesi abu kirimo akwap nako Israel adaun apaarasia awongon neda abu kodolia itoni laije ocilet loko Yorodan ne sek abatisa Yesu Christo itunga nepepe ka ikeyakia ke ka Jerusalem eyekalu lo apolon akwap keere needa abu kojaikinor kitukumikinor kwap kanu ailipakin akwap wok Uganda nepepe ka ipisikopin lutiek noi.
Akaulo aidereruun abongun ko Israel, Alupo ngesi abu eraasi 11.09.2022 abu koporo oibuga Dares Salaam ko Tanzania kanu aitolot aurianet na agwelanar na ikamanara ka angor nepepe ka atumunak nuko kide na akwapin nu eriokok na etolosio kiding 12 toni 14.9. 2022 kotoma aiboisit na ejenara noi kwape, Julius Nyerere International Convention Center ko Dares Salaam.
Akaulo na angetakin aurianet Alupo ngesi abu kolot aidamakin akan ke oitaabo lo aibwor koyapesi lo ebwoikinitere Ikwiin ido abu kojaikin aurianet na 77th nako akwapin nu ibumakina (United Nations).
Kanaebalasa pac, Alupo ngesi abu koporo itoni Bulaaya kanu abwoikin Uganda aurianet na 77.
