KAMPALA – Kangin ibore ejai ageunet ka esange! Archbishop Emeritus James Odongo, 89, loko Tororo ngesi da angetakin aijar ke kokwam akolong. Abu kotwana akaulo aisa ateker adaun ikaru lu ipu noi kotoma akelesia na Atulik. Etwanikit adekis na apolon nako Nsambya. Egirigiran loti kotoma akelesia na Atulik, John Baptist Kauta nesi etigogongi nu atwanare kec.
Mam itunga lu ejenete loatwan kotoma akelesia epetana aimurokin ngesi naarai ebalasi lu ipu ebe, amina aisa ateker kaitekoro ido komam esei ikur kobaale Rev. Fr Kevin Musisi, lo erai Vicar General kotoma Aanyanaret nako Tororo ngesi abala ebe, karaida mam ber esusut lo atwanare ke Emeritus Archbishop ejenuna konye ebe, autaara lem lo atwan ka adeka na etau adaun apak na ewoj noi.
Ejena lo atwan kwape ejaanakinan lo abu kodau ikaru lu ipu ijaanakini kotoma Aanyanaret nako Tororo. Eturit Musisi loatwan kwape etunganan lo amamei ibore yen mam apedori aswam kotoma akelesia kotoma okaru nepetai 44 lu aijaanakin kede aingarenikit akelesia.
“Arai etunganan lo amunono ido kisinyikoni lucie da aswam ibore lu eposik,” abala Musisi. Eyatakit ebe, karaida eyangunit loatwan kotoma aswam na aijaanakin akelesia konye ajai edakit epelu lo aiwe eijiri kitoni ne anonokaror kede atwanare ekaulo.
“Ajatar lo atwan kede aitapoeta nu ipu kanu akelesia ido komina aswam ke noi. Amina aisial itunga noi ido arai erai awanyunet na etunganan lo ibusakinit itunga aitup eipone lo isoma iboro ke,” abala Musisi.
James Odongo nesi loiwongonet araun Episkopi lo irionon ko Uganda ido korai Episkopi losodit lo Aanyanaret nako Tororo. Abu da bobo koraun apolokiton losodit lo atukot lo engarenok lu akelesia na Atulik kojenara kwape Association of Member Episcopal Conferences in Eastern Africa (AMECEA). Ijaanakit komakuk kangol irwan aarei. Euritai ngesi eraasi 27.03.1931.
