KATAKWI – Aiboi kane elae nesi eipud loka itunga lu ipu konye ajaut ka aiboisio lu elaete nesi ainingosit!
Katakwi TC nesi aticepak aiboisit na ejeni nu kaidules, ido karai erai mam, emina do korai icie ibore.
Karaida ejai apedor na aila akanin nuka itunga, konye agwelanarak luka osokooni loko Katakwi Taun kesi ekeutu angurian. Mam lu ipu ejenete ne ebeit aitenaar.
Engurianete itunga ebe, amen apedorosio nuko Taun Council aibwoikin apipai nuka agasia toma aswamisioit.
Elomunitos nu akaulo apipai ajaut aiboisit na ejaasi agasia komam esipokitai kanu aituk agasia. Pac abu erionget loka ojokotau eraasi 10.12.2020 kotam apucun amodokok na ejai osokooni, konye emamei ibore yen ijulakina ageun apaarasia ngun.
Adautu kwana apipai ngun ilapio ikany komam ibwaikitai toma aswamisioit.
Teddy Among, agwelanaran kosokooni lo apolon ngesi apodonokin ebe, esubit bala mam apedorosio nuko Katakwi TC itodolikitos epelu kec.
Eyatakit ebe, edolit apugan aijaikin apedor na aituk agasia nu ejaasi osokooni ne ejai itunganan yen ebolorit esokooni.
“Imodokok etaun, kanu inyo mam kesi ekototor angoliar isio,” akudiani Among.
Among Grace ngesi abala ebe, edolit ti asipokin apipai ngun orutei iwongon luka esokooni.
Eyatakit bobo ebe, edolit bodo Welthunger ainyakar apipai ngun do akorakin osomeroi lu ejaasi otaun Council karai emen apedorosio aitegear eiswamae loka apipai kangun kotoma osokooni.
Susan Apolot, auriat naka Aleles ido kiswamai ooteri kwape epoon ngesi abala ebe, edolit apedorosio nuko Taun Council abunore aisisianakin itunga aisac aicak agasia.
Rex Apwatum keda Milton Odiope kesi abalasi ebe, esubit amorosit apipai ngun aikengeng kosokooni komam ibwaikitai toma aswamisioit.
Angurianete itunga ebe, epodokit eyaitone loko Katakwi TC, aija itunga esolo do apalunit nu aitalaun esokooni.
Irene Alungat, adiope aberu na icipi itima kosokooni ngesi ekumanakin ebe, edolit ti Katakwi TC ailiacac naarai edit kitirian kede itaunin icie lu epolok.
“Biai ber cut epedora apugan aiteikin agasia ejaasi osokooni do konye aitopolorit aituk isolosinei”
Emmanuel Opus lo iswamai kwape arucokiniton akiro nu aila korionget loka Welthunger hilfe ko Katakwi kede Amuria distrikt ngesi abala ebe, egwelit erionget apipai ngun awongon kotiai lo sh1.6m.
Abala Opus ebe, eroko ber kesi itoikitos aki kanu apupun apaaran na edupakinere apipai.
Etacaunit Opus ebe, adaunitos apedorosio nuko Taun Council alimokin kesi ebe, ejai adupio naka apipai alosit akonye, konye eumokitos kesi da ibore mam aswam egeunar.
Ambrose Okwi, apolon eicolong loka LC3 ko Katakwi TC ngesi abala ebe, ejaasi ber kesi aibok aipanya nu agasia. Abala ebe, adautu kesi abokikin aipany kiding otaun kanu emotoka apatanikit awokunun agasia.
Enaaba ke, Joseph Okure Town Clerk loko katakwi TC ngesi agwetara kotoma osawa lo amacar iyemuto.
Ejatar Uganda kede ekisil loka aila ido erai kanu angaleu nuka itunga lu ejaasi ocaalo kede otaunin ido korai apuganasia nuko kwap kesi ebeit aitodolikin.
Kotoma osuulai, nepetai 12.2% kesi itunga lu ejarete kotaunin ido kojau aikeun kotiai lo 5.5% kangin ekaru.
Kejaasi ngun da, emamei edistrikt edio ko Uganda lo ejatar kede atenu na itekoro
