KATAKWI – Eminista lo aiwe akiro ka akomputan, ngesi alimor ebe kanu ajokis nako Katakwi, ekot itunga kere aitimonos ka ebe apodokin aitopol edistrika.
Alimuni nu kotupitete lem idingeta lu ejaasi kiding abwaak ka aseak luko Katakwi.
Ogwang lo eraba ko Aliakamer ne amanyia Emmanuel Opio lo Aicerit aberu ke, ngesi abala ebe epol Katakwi adepar idio itunganan ido ekot kojaun apuconor.
Abala ebe, ajaasi lem itunga lu itapasete ngesi kanoinoi Simon Ojaman ekansila lopac ingwalasik ko Katakwi kobala ebe adau ngesi aitim etuan ke kanu abu kisomak ngesi kere.
“Ojaman adau eong lolo aitim ijo omanyit kalo naarai irai ijo amuran. Elipit idio itunganan kere aitim idio kakesi yeni isomakit ijo nu arokok,” abala Ogwang.
Ojaman ngesi pac epadicasi kede MP Ogwang, konye edolu aseo naka 2021, abu ebe kibelokin aitiji ngesi karaida egangakit ngesi eminista irwana ipu.
