Aipit ao, akokorei, akinei, adigain, ipegei, kede akituk kesi aswamisinei nu akoru, nu edumununa akorion Florence Adongo isirigin.
www.aicerit.co.ug | Na George Olupot
“Kanu akorion ameet adumunun isirigin kotoma akoru, ekot akorion ajaut kede aswamisinei nu akoru nu iyatakina,”
abala Adongo na ipedori adolokin osimu enaba 0777994182.
Etacaunit Adongo ebe, ikoto ijo isirigin lu idioko kanu agwela ikee lu eimidi igwelari akokor arai akokorei. Ikoto aicap amisiri igwelari akinei arai adiga adiope arai aarei.
Iyatakina akokorei adigain akinei ka ipegei ejok bodo. Ikoto bodo isirigin lu ipu igwelari akiteng adiope arai aarei. Dokonye ejai aswamisioit kwape aipit ao, ejok do adepar.
Toma ofaamu ke Adongo lo ejai Aima, Kakusi, Olio, Serere district ikajit
Adongo nepetai atekerin kere nuka amoliga. Toma kwap ikito ne erai alalau
imitai 20×15 ejaasi amoliga 30 nu elomit ao kere.
Ejaasi amoliga nu esubitai kede amoti, ibukito, akero, agoloi edukudukut, kede nu itojokaritai da kwape nat; Kenya Top Bar (KTB) ka Langstroth. Aipit ao edumanakini Adongo isirigin lu ipu kakere.
Epone ageara.
Abala Adongo ebe, mam ngesi abu Kodum arerengu na adukokin konye abu
Lokasuban isirereng ngesi kede idwe. Kanu aitopoloun idwe ngun komamei agangat naka ekiliokit, ajai ngesi aipakas kwape kaluce itunga lu ican ocaloi.
“Acogoror aijar. Mam apatana adumun isirigin lu itemonokinet, karaida atutubet naka ipudesia luka ekale. Kageuni eong aingic aswamisinei kere nu akoru aimoriarit aipit da. Abu eong asek aipit ao naarai mam ipuda alupok nu ipu, mam ipuda aidario bala akinei arai akituk. Ao alope bon elosi aimo inyamat ka akipi ke,”abala Adongo toto naka idwe iuni.
Kanu ageuna, abu Adongo ojep akero kosodi ajweun amolig ke nasodit, iladaari toma kede aworet oburi awaitin oburiari kede amilimilio kikajakini.
Aitutuorio.
Kanu amisiikin epone lo idarere ao, abu Adongo kodolok mamaike lo ipisi
ao, William Opolot. Abu mamaike koinak ngesi aibwokenen ao anyoun kane ikamunere kitoni ne ipisia je. Kosodi kangin apak na ewadia je ao, ajai ngesi da toma aitetemonor.
Kwangin abu ngesi omisiik iponesio luka ao kede epone lo ewadere esike.
Kogeari ngesi da aiyat amoliga.
Toma akodakina kede mamaike, abu Adongo odum arerengu na adumun
aitutuorio na etolosi SOCADIDDO, NAADS, kede edistrict loko Serere.
Epone itolosio aswam ke.
Ikaji Adongo amoliga kuju opirin arai baat kuju naka amatapalin nu icweitai arai erai amolig na itojokaritai.
Iwadikai ngesi aparan na alomara ao tetere epatana aimarar apaaran na
ewadere esike.
Kedol apak na aiwad idiope kotoma odwe ke iuni nesi etingakini ngesi
akim owadi ngesi itwasamai acuma na ekusi apuru, smoker, tetere eusi akape nu elaete numam ipwokuna amususa.
Eyanganari Adongo akiria nu atap, akipi, araito na epapali, aijujueta
nuka eikajo asipokit aboisit na ipisia ngesi ao tetere ao enyami.
Epone ejaar efaamu ke. Ebwaunit Adongo, kede iligo ka ewaya aboisit na ipisia ao. Airimokin aboisit ngin ekoriei Adongo emudunga, emuogo, imucugai, amugog, ka icie.
Aiyat esike ameda.
Abala Adongo ebe, edau ngesi aiwad esike, ijilili kituranari acupai.
Elita ediope elosi kanu isirigin 20,000. Atutubet na elita isirigin 10000. Icupa yen mls 100 egwelari isirigin 2,000.
Eswamak
Abala Adongo ebe, ngesi alope bon kede ikoku ke yen ikaru ikanyarei kesi itolosete aswam na aipit ao.
Ameda na adumu
Abala Adongo ebe, esipedo aipit ao ngesi aipejo aboisio kwape nat Nakasongola, Bukedea, Mbale, Arua, Moyo Kampala ka acie da aisisia epone lo ipisere ao.
Erai kwana ngesi aetutuoran luce akoriok aipit ao. Edumununei isirigin lu itosioma idwe ke. Apese adiope angetaki sinia 4.
Luce idwe iyarei esiomete opuraimare. Alemu aipit ao Adongo kotoma aigir ikatalai ajaria.
Kodumak aidules acie otoma apapula!
