SOROTI– Nepe elomuni Soroti kwape ecity, emielanakinos itunga lu
ipu ebe adoikit arereng ne ejai Paulo Omer kwape lo abuni aibwanen e city,
konye ajaasi atiokisio nu mam itunga lu ipu amisikitos.
Abu apugan kitolomunite ekisil lo akotore itunganan yen ekoto aibwo kwape emeya lo eyait e city ajaut kede apapulai nu eriakasi kede itunganan
yen esiomit kitoni adolere atukot nako sinianaikanyet kape, arai ariaka kede apapulai ngun.
Nu ican mam emunot lo akotosi itunga ejaatatar kede apapulai ngun arai
nu eriakasi kede nu ipudai kotoma okisil.
Kwangin do, mam bobo Paul Omer ebuni abwaa kwape emeya lo ecity loko
Soroti, konye ebeari do kwana ne kolo ageunia aipen aep naka politiks Soroti city division East.
Arai kolo ngesi apolon eicolong LCIII kangina. Omer, nges elope abu kolimok Aicerit ebe arai akiro ngun abeit, ido arai aswamisiot na itunga
lu mam akotosi ngesi aibwanan e city.
“Erai abeit. Eswamanunos ngun kwangin ido abongori kwana eong Kide na e city, ijeni ijo eriakasi nen da kede emunicipaliti.” Abala ngesi.
Eyatakit ngesi ebe adau ngesi aikopakakin Joshua Edogu emendera lo epate
loka FDC kwape lo ebuni abolobolo kede Grigori Mikairi Egunyu, apolon eicolong LCV Soroti, lo ineket araun emeya lo ecitykotoma atikit naka NRM.
Edogu nges erai apolon eicolong lem LCIII Engalakimak naetaun,
ido nges abu kolomunite kotoma FDC kanu tii abwoikin Kide na e city.
“Adau eong aikopakin Edogu emendera lo ngesi alomun abwa kwape emeya lo ecity abongori do kwana eong Kide,” abala Omer.
Abala ngesi ebe araasi ngun kere aswamisio itunga lu mam akototor Soroti
apol, konye ebe epote kesi aanyun nu iswamaunos, kilipite itunga adumun
ainapakin.
“Eswamata kesi ngun kere, konye Omer atwana,?” engisit Omer konaki akwena. Abala ngesi ebe abuni ngesi nepepe kede apolon Peter Emaru lo ebwoit ko Too nako ecity ainyabuk ka aitutuk aomisio nu epote kesi aijaanakin Edogu kwape emeya nu epote aitopol ka aduk ecity loko Soroti.
Omer nes kolo elomunit politiks kwape lo abwoikinit Moru Apesur ko kansulo lo emunispality ne abu koraunor eraban. Ekaulo kangin abu koraun apolon eicolong LCIII Kide eroko kesomuna araun emeya lo etaun.
Ejena Omer noi kanu eirabakiro nuka politiks, kitepigite duc apugan kotoma opate loka FDC ka akiro nu aimidic apiyai, ibore yen lem einakit ngesi adinganar kede ekalaani lo etaun Moses Otimong.
