Ailipa ke Robert Kyagulanyi kojena kwape Bobi Wine kanu aikisar aijuluraet ke na itepegitor aseuno ke President Museveni nesi esiriengu itunga akaulo ipulidan ke alimor ebe, emameotor kesi kede apapulai nu ecamakitere kesi aswam.
Iswamauna nu Naiwongonet ne eboikinor adieket kanu apupun ailipa na aikisar emusaago lo aseo.
Ipulidan ke Kyagulanyi lu abwoikit Medard Sseggona kesi apotu kolimokisi adieket ebe, adaunitos apapulai kec amojong adepar apak na atubokitai ido ebe, ajakai aisiteteun.
Abu Chief Justice Alfonse Owiny Dollo kingit ipulidan arai alimokitos kesi eregestra lo adieket konye apotu kitacautu ebe, mam. Abu ewai lo ebwoikit yen itoosatai kingarenikite, Attorney General William Byaruhanga, kolimu ebe, elosi ngesi kede abwoetait na adieket.
“Idau isio ailip Law Council aisiteteun apapulai kosi. Apotu apaarasia kec konangakisi kolap Omuk. Apotu isio kenerutu ebe, ajok aikeun akiro nu,” abala Sseggona,” elimokini adieket.
Abu Chief kolim ebe, ajok aisukunyikin awosan kanu ipulidan ngun aiwadikaikin ailipa kec ne ejai egirigiran lo adieket na apolon kanu adumun ber apapulai nu iswamata adaun apak na euriana.
“Ajai eong aicorakin egirigiran lo adieket lo ti adumakin yesi apapulai nu ipote aitwasam kitoni 18.03.2021 kanu emusaago lo angetakin,” abala Dollo.
Aponi kisukunyikinai awosan ngin kitoni Naikanyet.
