Kotupitete agolio na ikorou lu elomuna akinyet Uganda keda anyunyura na apotu ederepak amotokan nu apolok nu akinyet kitolomutu, ibeeyin lu akinyet kesi apotu kodokasi kuju.
Ko Katakwi, etiai lo akinyet nesi abu kodoka sh12,000 kangin alita.
Apotu ngun kitunyurikisi alotok keda ederepak amotokan kitoni lu ipikipikin eraasi 18.1.2022.
Ben Kiwanuka Angiro lo itekeri amotoka kotaun lo Katakwi ngesi abala ebe, epol apugan aitosom isirign lu atacak esolo kotoma apakio nu aisup aseeta keda atacia ebaja lo aremokin apugan aijaunun akwapin nuko okinga.
Joseph Obwale lo ocaalo Kaimoru, eitela Abela kotem lo Getom, korai aloton, ngesi elipit apugan aitidisiar isolosinei naarai alangiror do noi.
“Kwape atacak isolosinei, mam etunganan lo okwap engerit aitac esolo konye itidisirai keda angaikin irutei naarai edupo kwana ibeiin kuju ido agwelet iboro da alangiror ebeii kec,” abala Obwale.
David Ongodia ngesi anguriani ebe, abilaki kesi apugan nako NRM ebotet akaulo na aicak naarai ekeun ebeii lo akinyet ido emunaara kwana eipone lo aiman.
Pius Aceta ngesi abala ebe, abongosi kesi apugan ecaka ibodai akaulo naarai erai kesi aingadit ipikipikin otogoi kanu amamus apiyai nu egwelet akinyet.
Martine Omoding agwelanaran Akinyet ngesi abala ebe aikeun na ibein lu akinyet etibwou alosit osokoonin, icie mam epedorete alosit kitoni adekisia, eyatakit ebe Ngariam na lem erai alosit sh10,000 ejulakin toni sh30,000.
Omoding ngesi abala ebe itegelikino kesi akinyet kotiai lo epolo ko Soroti ido kodit ameda na edumunete kesi.
Julius Opus, ecakan eboda ko Katakwi T.C ngesi abala ebe, ekot apugan kinyaku etiai lo akinyet kwap na sh4,500 naarai emamei ameda kotoma.
Fredrick Adulai, Otim lo epolokit erionget loka Foundation for Development Children at Risk FODCAR ngesi abala ebe ibeiin lu akinyet kesi eduposi amukian, asioman keda agwelanar etionuni.
“Amamuun apolo naarai icuuman ka idukai lu apolok adisiar aitolomio na iboro naarai epol esolo lo itatacio keda eipone lo aitolot kitoni ne ejaasi itunganan lu okwap etiono,” abala Adulai.
Emmanuel Omoding, ecakan Eboda-boda ko Katakwi, ngesi emonyi ebe ‘ejesar eisawo ke’ naarai ekidiokoto alotok.
Eyatakit ebe, mam bobo ngesi epedorit ainyakanar sh85,000 kosabiiti lu elooni lo epikipik kelo naarai mam edumunenei apiyai nu inyakanara kanu aikidiokus na alotok.
Francis Eupa nesi abala ebe ayangau aikeun na ibeiin lu akinyet atwaniar keda ekadakada okale ke naarai agweli lem ekale ke iboro konye kwana edoelar adumun ke.
