TESO – Inerit Ebaibuli akiro nuipu, nu ekot edeke itunga kere atupit tetere irumunete ajakanut na mam edaun. Adis kangun kesi nuta: itunga kere aminanara ka aisioni luce.
Konye nu kere esubitos bala apapu kane ejaasi Ipiskopin lukapolok kokanisa loka Lifeline Ministries. Asub bala adautu lu ailaira aiperikin ber ibaibulin kwap do konye airarun ekaulo.
Araasi 26, k’Naebalasa, adieket na adoketait kana sodit koSoroti, nesi abu koswala bishop Peter Oyet lo epolokit ekanisa loka Life line ministries akaulo na acakar emusago lo etoosator ngesi bishop James Israel Tukei kanu ebe akoko abaluwan nu alupok aijauna apesen na eloon lo isirigin 30m ko Vision fund.
Kotoma adieket na apolokit Atubon Emmanuel Pirimba, Tukei ngesi aponi kolacakinai ailajara ke akaulo na epikoro atubon angicun abeitonut na ti itogogongo ngesi kwape ekokolan.
“Mam adieket na epedori atubokin lo itoosatai awenio kanuka emusaago kalo, lo itosatere ngesi kanu Akoko land tittle, kwangin alacakini eong James Tukei kasodi acamakin ngesi ailajara ke kwape ibusakinitor naarai emamei ajenaanut kwape ti itodiaritor ekisil lo 254 (1) ka 271 (b) ka “C” luka penal code act, idimarai ejai aibucaret acie,” abala atubon Pirimba.
Tukei ngesi sek arai lo apolokinit Aanyanaret nako Lifeline ministries ko Soroti kwape episkopi konye abu obelar ageun ekanisa ke bon The light Resurrection Ministries okaru 2018.
Abu ibore ngin odilita etau ke episkopi Peter Oyet lokolo apeleuni Lifeline ministries kosodete acelakin amaria alupok ka iboro icie lu ekanisa itoni ne adolioto akiro adieket.
Kotoma Apak na alimoro etube, atubon Pirimba ngesi kobu oumok ibore eyaunit imakio ekanisa ejie komam itimonoros.
“Lo enguriani kalo itosatai da kere eraasi ejaanakinak luka edeke. Awomit eong ebe, eweanarete eijiri lo kajokan, lo isinyikoikit aipuc, aminanara, angirikinit, aitimonor ka acie da.
Aumokit eong ebe, inyobo ber mam eraar kesi itodiarete awanyunet,” abala Pirimba.
Kingita Oyet, nu ikamanara keda aipuc, amina, ka aitim kwape eneritor atubon, abu kotema ebe, inera atubon konye mam ejeni adoketait na aitim na inera ngesi kwape itetiar komusaago kangon.
Abala ebe, emamei ngesi ationis kanuka aipuc k’aitimonor konye irwana pu apotu kesi kotamata aiboinikin keda Tukei konye abu komwang kesi.
Abala ebe abu Soroti pastors elders Fellowship Association (SOPEF) konyarau kesi kanu apuconor konye mam Tukei abu kocam abunere.
Eyatakit ebe, abu Capt Mike Mukula da 0tamak konye abu Tukei kogir akiro kere kosodi aisac airiamuneta keda kanges, abala Oyet. Bishop Tukei ngesi abu kisumunik airid Oyet k’dieket kitoni ngesi aitac egelit kanuka amunamuna ekekiror kwape ekokolan.
“Ebala ebaibuli ebe, emamei adiakaret na iswamai ijo komamei alecoret ke, kwangin ibusakinit ngesi alecorio ka aitac egelit alucio akituk ke,” abala Tukei.
Kwapekwana, emusago lo ebuni aitacaun eyaitene loka ekanisa lo adukio keda isirigin lu ejauno ko Vision fund ngesi eroko Tukei, lo kwana epolokinit Light Resurrection Ministries keda atupitok iriete keda Bishop Oyet
