TESO – Asioman nesi elacet! Mam auriak icie bala emisiikitos ngun naarai akaulo na apukor isomeroi eraasi apaarasia 5.09.2022, icie kesi eroko inyakara idwe kec asioman.
Isomeroi lu ipu kesi ikidioko idwe, ibore imarakitos auriak icie toma okadakada lo eroikinit akerianut na ikalia.
Bazaar Ward PS ko Kumi Municipality nesi ajaasi abongoritos esisiak 700 asioman Naebalasa kotoma esisiak 1,304 lu ajaasi osomero eroko egolokina esomero kanu ataamu naiyareit.
Francis Okeja, apolon esomero Bazaar PS ngesi abala ebe, esisianakin kesi ajaasi kere ekapakina aswam ido apotu ogeasi aisisianakin.
“Mam isio ilosi aidar idwe lu mam eponitos asioman naarai pac okau abu asioman itolutolun kelungata imwalimun aswam keda ekorona da,” abala Okeja.
Eyatakinit ebe, auriak lu ipu kesi etamakitos agwelanakin idwe kec iboro lu itosoma kosomero kilema lu ipu lu ejaasi atukono nukokwap.
Simon Omadi apolon esomero Kajamaka New PS ngesi abala ebe, ikidioko esisiak lu ebongoritos asioman.
“Ijau ber isio idwe 700 Kanaiyareit kotoma otiai lo edeparit 1000. Ilipit isio auriak aijukun idwe osomero naarai adau asioman agear ido ejaasi imwalin 14 kere.”
Paul Aogon, apolon eicolong PTA ngesi elipit auriak kere aanyun ebe, ijukarete idwe naarai adaun apak na ajaut ore.
John Baptist Asinge, LC3 Kanyum Town Council ngesi etoronit auriak lu eroko eridakitos idwe orerie aingarakit kesi aswam.
Abala ebe, adautu keksi aitemokin LC1s keda LC2s ageun aswam ipotoloi ocaaloi kanu ailologaun iduwe keda auriak lu eroko eriditos iduwe.
Richard Ochom, Emeya lo Kumi ngesi ikwenyarit auriak luko Teso kere ebe adaun apak na aiboi keda iduwe oreria.
“Ido ekot auriak ajenun ebe asioman bon ngesi ideuna keda oni kwape Iteso karai mam oni icasi aitosiom iduwe wok ibuni oni aisal kau otoma asioman.”
Akiro kesi edeleleete ebe isomeroi lu ocaaloi kesi eroko idwe ejaasi oreria keda auriak ido idis da lu ejaasi osomeroi ejai ekadakada lo iboro lu itosoma atukot.
Auriak lu ipu kesi ekudianete kotupitete aiyatakino naka isirigin lu esomero, ibore ebe, ijaikit kesi icie mam epedoritos aijukar idwe kec asioman.
Karaida ikote akiro nen, apugan nesi pac abu iretak isomeroi aisac aisud aiyat apiyai konye isomeroi icie kesi adautu aiketar akwes!
