Ilurasi adekak kanonoi idwe adekisia konye kingitar ebe inyobo kangin adekan ka edaran kere inera ebe adeka naka eimidi eroikit kesi.
Kotoma oripoota lo orionget lo angaleu k’akwap kere, Uganda nesi akwap adiopet kotoma atomon nu ingarenit ka adeka na eimidi.
Acie kesi DR. Congo ka Nigeria. Kanu kangun, kanu aitam aitikitik ka aitidisiaar akora na adeka naka eimidi ko Uganda.
Kanukangun Rotary Club nako Soroti, ipadicasi ka iriongeta icie kwape nat USAID, PILGRIM Africa, erionget lo angaleu, Bill ka Melinda Gates foundation, Katakwi distrikt, Rights E’ ka icie, kesi apotu kipadicakinos kanu aitam aipopoun iwaitin lu aitam aitikitik adeka naka eimidi kotemwan luko Magoro, Kapujan ka Toroma kodistrikta loko Katakwi.
Kitosomaete iwaitin lu egelegela kwape nat aisik na itogoi, aitam aitikitik auriaro na isiru lu ikopete adeka naka eimidi, amukian itunga ka idwe lu ejaasi awanyuneta nu eimidi, abu ber adeka na kotama aijesun.
Egeunitos ainapeta nu okaru 2017 ido erai apeleikinet aijesun eikopa ka inaabai lu itunga lu edekanakinos eimidi kwap na 20% okaru 2025.
Dr. Yeka Adoke, lo elomunit kosomero lo angaleu na itunga ko Makerere elacuni ainapeta nu, ngesi abala ebe kotemwan lu elimoro ko kuju ido ko Kapujan, apotu kesi kitosomata ekia lo isikio otogoi ka aneetin, okalia 3,044, kotem lo Toroma itosomatos kesi ekia lo isikio otogoi bon kangin ilapio ikanyape ido ajai enaaba lo itunga lu edekanakinos eimidi aijesun kwap.
Konye kotem lo Magoro mam kesi itosomatos idio ibore konye ajaasi kesi icorete itunga iwaitin lu aitikitik adeka na (Standard of Care).
Nu apotu kesi kongicutu nesi ebe eyata enaaba lo itunga lu edekasi eimidi ko Magoro noi ido lucie itemwan, ajai enaaba aijesitoi kwap.
Abala Dr. Adoke ebe eroko eimidi irukumit Katakwi naarai ipu iswama lu ejaasi ngina ibore epatanikitor isiru lu ikopete eimidi auriar.
Abala ebe kotoma aingic kec itodiei ebe aiboisio nuko Apujan ka Toroma nu esikio ka aikor aineetin, nesi abu adeka na eimidi kijesunor kwap konye ebe ewai ngon lo aitikitik adeka nesi ineket apiyai nu elalak noi naarai ekia lo isikere elangir aboola ke.
Abala ebe karaida ajai kesi amuno ebe ekot kijesun eimidi kwap konye ekotokin apugan aibuaikin ka kesi kanu alacun apiyai nu ipudakinos kesi.
Abalasi ebe ekotokin itunga aswam kagogong kanu aitikitik adeka na kwape nat, mam acamakin akipi aibwounun ka aira enyait airimokin oreria.
Dr. Maureen Amutuhaire, arucokiton ainapeta nuka aitikitik anyalatoi naka eimidi korionget lo angaleu, (ICCM), ngesi abala ebe ekot itunga arukar aitikitik adeka naka eimidi eroko enyalaara.
Ecorakit ngun lu itutuoritai ocaaaloi aicebokit airimokite amukian itunga ka aicor kesi. Kobala ebe ekot itunga aikat ikutuo lu idunyasi ka ireria kec.
Lawrence Olupot, epresident loka Rotary ko Soroti, ngesi abala ebe kesi ipirunitos aomisioit na aitolot aingic kanu akiro nuka eimidi.
Abala ebe epol ngesi alakara naarai nu alacu aingic kec itosomao kwana kau ainapeta acie nu apolo k aitikitik eimidi.
Eyatakitos ebe ipecunitos kesi ainapeta nu ikaru ikanyape ido edumunitos kesi agangat kane ejai erionget kec loka Rotary nu edolete nepetai sh1.2bn, ido apotu kesi kitojokaasi aijaikin erionget lo angaleu ka PILGRIM aitolot aingic na.
Abala ebe ipu akiro nu esoma Rotary Central nako Soroti ido akodakisi bobo adekis nako Katakwi kere akipi naarai ationikit kesi ewai lo adumun akipi.
Susan Kituzi, na pac arai apresident nako Rotary, ngesi abala ebe egwelakitos bobo kesi adekis nako Katakwi apipai nu ekwam lo iyengete itunga ka aisiteteun adekis kobala ebe etaagi da lo ikengo kadekis lo imonoere akipi nesi iboro icie lu ikopakitai adekis.
Apaaran kangin, abu bobo Rotary okorak angon kere nu ajaasi adekis akalayan nu itosomaete ailongia ka aswamisio swi.
Apol angor alakanar konye aponi komaikinai itunga kere alomar atukot nako Rotary ido ebe mam erai na itunga lu ebaritos apiyai konye lu ebaritos aikor ka amina lucie.
