Akaulo eong ailatoor ocaalo, apotu akonyen ka ogipasi epone lo ejatatar icaaloi wok kede ‘iboomun’ lu idaritos itikatikan kanu aduwor.
Ejaasi atumunak lu apotu kojalakisi esomero katukono nu okwap. Ejaasi da bobo lu apotu kosalakisi osinia kogei aboola amamikin. Eraasi lu atumunak lu idilasi ocaaloi wok.
Inacan ka ipajan wok lu mam iteete ingaren kec.
Ngin ipucit lo etakanuni kocaaloi, kesi lusodit adolere emusumusu akwap kwape lu ‘okadibong.’
Atumunak lu amen auriak kec da aisinapikin ikec iponesio, egurupu lo iswamai nu esilok kede nu epali ocaaloi wok!
Epedorete iduwe lu aimat ikec ipapulai, arai aisokot ekec ejae omamei yen epedori aigwap arai alecor naarai erai iduwe lu mam epodokitai!
Akaingiset ebala ebe, Aibodo ber adol aipugae lo ateker kwa kolo? Aibo abeasi Iteso lu aricitos ikec iduwe?
Arai da mam arai papakon, apedori itunganan yen epol alecor ka aiteten ikoku edumu ediakarit arai iswamai nu mamu edolitos.
Apaarasia nu, erai kwana ngin itunganan kanuke, dodo Edeke bon isimorikikini Itunga Naesabiiti!
Epedorit ateker aibwapit itunga lu esalete eibworo atutubet. Epedori da bobo alemun isirikalei lu ilologaunete itunga kere alemun isirigin lu akio, konye amen ateker aipoun acoa na aitemokin iduwe lu ilatosi kosentan wok.
Icie kakesi abeit ti ajaut osomero konye mam bobo esiomete. Erai do kwana lu amen auriak kec. Apuworos atumunak!
Oni lu mam ijai ocaaloi mam kipedori amisiikin ationis na. Arai isiomit ijo kosodi alosit aswam opelu kon, elimokin ijo ebe amen okooke obore esomero, siri iyalamikin naarai ngupengun lu ebilerikisi kocaaloi kesi engetakinete akon aijar.
Mam duc iduwe lu mam iponesio itemokina eraunete itunga lu ejokak. Eyaunete ationis ocaalo, ipolisin da mam epedorete.
Ekot ateker keda auriak aitam adumun epone lo ainyakun aipudis na iduwe ne ejai ateker kwa kolo, tetere eyuunete aijar na iduwe kec nakoingaren.
