KATAKWI – Kageunet ajokuka akiro kere kodukone, konye abu edinget kojaun okale ke Daniel Opio ne agitara Samuel Amali keda Immaculate Aliokoit ekale!
Eigur nesi ekulae kotoma okale ke kalo ber arai apolokiton angaleu ko Katakwi, Samuel Amali, ido kolimitete nu ‘epiu’.
Karaida inerai nu epoison konye nu aumokin bobo abu elakit kolomu nape iwalari akwap kedaun ainumunum apaaran na aurunio naka Yesu Kristo.
Edinget kiding Daniel Opio lo erai Emuluka, Alibina Adiro keda idwe ke Samuel Amali, Amuge keda Malisa(Amuyoik) kinerate nu eyarit ngesi ageunor edukone aitolutolun.
Karaida atamit ekanisa loka CoU aitupucikin Alikoit keda papake Opio konye adwaris nesi abu kosal eligani kiding Amuge keda Malisa (Amuyoik).
Kotoma airiamun eraasi 26.12.2022 abu ekale ke apuserut Agnes Akwi, Obar,eitela Amilimil ,etem Kuju, kiworosi imurak kec lu atekeri na Itollun lu ejaasi ocaalo lo Angorom, kotem Kuju kodistrikta lo Amuria akaulo apupun nu epoison karai da ebwaitos amurak aiyeya. Abu ibore ngin kidupo aitutubio na elakit.
Apuserut Anges Akwi toto ke Immaculate Aliokoit nesi ewoluni aiyeya ebe abu akoke Aliokoit kolimok ngesi ebe, aponi kotuboroi ngesi amoiten keda aibaris naarai ebe anyamit epoison.
Aibo etoruni epoison
Abu Apuserut Akwi kikenyak atukot ebe abu akoke Aliokoit keda Samuel Amali koloto aibwap amere orekec ipolok konye kwape mam ateran anyamia akile kodia aponi kogitakinai nesi bon eboo konye abu kodum ationis akaulo awodor eboo atapio aarei bon koduo akwap.
Eyatakit Akwi ebe kwape abu akoke kinerar nu atwanare ke, abu ngesi kingit ne anyamitor konye ebe, abu ber konger alimor kobala ebe nepenen ebeitor ikoku ke aiboyo ido ebe mam ekoto aigurokin.
Angela Ikwaput, ija ke Aliokoit ngesi abala ebe kodum akoke eperi, kiboyete tatake keda Papake Aliokot kosiep ebe, kolosite amuran kec alemun ekia lo elekunere epoison kadekis.
Samuel Amali, ngesi abu kolimok amurak ke ebe aberu ke nesi ejatar adeka na ajimis nu akoik adaun kwana ikaru 15k kitoni.
“Inyamit isio apaaran ngin konye ibore yen erono nesi abalang na abu kotenya ajimi.”
Abu kimuwa nu aberu ke aingalakinio epoison.
Ebeliarit ebe, karaida inwakunitai aberu ke epoison ko Mulago konye ejenete kesi ne itorunit epoison naarai ejai edinget kiding aberu ke keda ediope esoman lo inwaki k’adekis (Lab Technician) lo Amuria.
Eyatakit ebe, adiope apaaran apotu kesi kodiloto aiyam ooteri ediope konye apotu kodumutu ejakait lo adingatar aberu ke ejai owoteri.
Etatamit ebe akotosi kesi acok nu imusugoin (irish) konye amamete kolosete amoun aiboisit acie konye apotu kiyapata ido kegeu aberu ke ainyam abu kojalak akaulo apupun iporotoi enyamete.
Abala Amali ebe, keyangar aberu ke South Afrika abu kinomak ngesi esimu esraasi 15.12.2022 ebe epoison lo ofactori ngesi anyamarit aberu ke.
Daniel Opio, Emuluka lo Amilimil Obar COU, ngesi abu kilair ebe, mam acudi konye elimokitor ateranike ebe “mam eong acudi ido ajatar engo keda acudan ka ngesi Edeke.”
Abala ebe, karaida lem epotu ore, mam ateranika anyami konye okilenika anyami.
Etoronit ebe ateranike nesi ‘enoki akituk’ , eroko ipokesio ido edwar etau. Eyatakit ebe ateranike nesi ipu lu engolopotar kanu aikenyikeny abeit.
Ateker na Ikarebwok etojokasi ebe elakit kojaun kiding akokec Aliokoit keda Samuel Amali.
Amali negsi abala ebe itunga lu aberu ke kede auriak ke kesi alimonokis ngesi nu elakit atenak akanyape konye kwape aminar aberu ke, mam acamunit.
Eraasi 26.12.2022, abu kitodol irwan akanyarei neda abu ngesi kocamunia nu elakit.
Apak na imacaria iyemuto, Aliokoit ngesi mam aponi kocamakinai ajaun aurianet naarai etapasuna aomisio kanu adeka kede akaulo adumun abaluwa na alemario k’aswam kwape anasit keda ebe alosit Soroti kanu aimo ikapun aigadis na apiyai.
Amali ngesi kwana esali ejena kotoma oitaboi kwape lo alak ber aberu adiope.
Akiro nu epoison kesi mam ber epukoritai edio emusaago karaida elimitai ebe, esubit baal ejena esusut ke.
Eroko akiro nu epoison!
