Soroti – Ailel Okadibong nesi apopir iwos! Mam ngun itodolikinos karai emamei DJ lo ikoleri aicul amoru.
Kitoni apupok iredion da, ekotosi kojai etunganan lo epedorit airiamanakin awiinyu naka emusik.
Simon Peter Omoding kojena kwape DJ Sppitch nepepe ka Mutumba Edirisa kojenara kwape DVJ Mutumba kesi lu adautu amisiikin aisibuk idwe Oduk iwos.
Epopirete lu emusik kitoni ainyinyir adaun akuan naka itunganan da.
Eramete lem idiopediopen konye ejulakinos akiro. Ebumakinos airam nepepe.
Dvj Mutumba lo ebunit ko Masaka kede Dj Sppitch kesi kere iswamaete VOT 88.4 FM.
Aipadicakin kec nesi abu kipirun kosabiiti lo atubor ne ajaar Dj Sppitch ainumun amojongu ke Skypes.
“Amuno eong ebe, eraun na arucokina na eposik nasodit ko Teso. Ikoto isio airuk Teso kede emusik nepepe,” abala Dj Sppitch.
Eyatakit ebe, epote kesi alimor apaaran na eponiata itunga lu eminasi kesi asesen eipone lo itukulata kesi aram.
Emina DJ Mutumba aitukurian aomisio nuka ekolerok ko Club Trends na kwana ejulakin araun Explorer, kipiripiri Dj Sppitch da idwe Oduk itauon ko Galaxy Country Club ko Ngora.
Kegeutu itelepai lu aitukul aram, erai ajo anyoun kadoketait nati.
Ejatar DJ Sppitch ka ediploma lo apirianut na ayoere kede esinema.
“Akoto eong aisumunikin itunga ebe, idau isio aipopoun acoa na aisial itunga. Ebeit adekasinei nu aomisio da aijulakin naarai erai emusik ebur lo ailonganar aomisio,” abala Dj Sppitch.
