Ejautene lo ekorona ko Teso
Dr. Etolu, emuron lo ingarenikit aitijio na ekorona ko Teso ngesi abala elimokini apapula na ebe, ko Teso kere, itunga ber 55 kesi enwakun kede adeka na. Kotoma kangul, adekak 41 kesi adaun aimukeun ido, aabongosi da oreria kec. Abala ebe, adekak 14 kesi eroko edumununete amukian kadekis nako Soroti. Etacaunit da ngesi ebe, emamei ber idio itunganan etwanit ko Teso kanu adeka kana.
Dr.Etolu ngesi abu kolimu ebe, ko Teso kere, itunga 350 kesi aponi koyangaarai ogalitiini akaulo na aomitere ebe, apotu kimorumorunos kede lu adekasi ido, kangul kere, itunga ikanyaarei kesi aponi kinwakunai ebe apotu kikatunitos adeka na , ne aponere koyangarere kesi adekis na apolon Soroti adumun amukian.
Kanu ikamunitos akorio naka masks, abu Dr. Etolu kitacaunite ebe, idistriktan kere luko Teso apotu kodumutu masks konye bon ebe, mam apotu kilosikinos itunga kere. Abu kolimu ebe, adautu kesi aijukar eripoota oministre kanu aiyatakinio naka masks tetere edumunete itunga kere.
Ejautene lo ekorona ko Uganda.
Kotoma oripoota lo itolomunit eministre lo Angaleu kakwap Uganda, iurian luko Uganda 3,667 kesi adaun aitogogongoor ebe adautu aikatun adeka naka ekorona. Kotoma kalu, adekak 859 kesi eutasi kopekwana kesi adautu angaleun akaulo na amukian.
Kotoma apak na kidoyo okalamu, etegogorit eministre ebe itnga 43 kesi ber adautu atwakare kotoma adeka kana. Ilepunit da eministre ebe, luadekak kesi apotu kokodakinos kede itunga icie lu da imoriaritos idunyeta, ipajan, ka imurok. Abala eripoota ebe, adau emistre ber aibwapakin itunga 22,314, lu apotu kimorimorunos kede adekak, enwaki da 28,635, ido, eroko kesi ibwapitos 6,321.
Etacaunit eministre bobo ebe, apedosi ber kesi ainwak itunga ber kere 405,547 ko Uganda
kere. Itunga da 3,539 kesi ber adaunitai agitar toma aiboisio nu idarere ngun lu eomitai ebe ejatatr arai, apotu kimorumorunos nepepe ka lu eomitai ebe ikatunitos ariebo na.
– Akiro nu kesi edumunitai kolago
loka WHO, oministre lo Angaleu
nepepe ka Dr.Etolu
