Epiraki Karah aram acoa?


Karah Gloria, araban na apedo angirikin atiokusiio nu airam
Sports View Hotel 730x31 Ad

Aram ko Teso nesi ipu amukuran aitelekaar aseregen! Eipone ngol engopianarata aramak lu ipu akaulo anyilun imorut idiope bon. Erai icie aibong ocaaloi.
Mam konye akiro epataka kowai lo aramak nu eraasi angor konye araman na ebekunitai ko Ngora, Gloria Gloria kojena kwape Karah ngesi abu komwang ngun.
Idukurit Karah Kampala. Abu koleku eipone lo aimedaun ke kotoma aram akaulo Nathan Eyagu loka Aicerit aketanakin ngesi aingiseta swi.

Aicerit: Irai kopekwana ijo araman na ekeun adoketait koteso ido ijai irukosi ka aramak lu ikiliok, eipone bo ani ipedoritor ijo aswam ngun?

Karah: Mam aram epatana arai eninik itunganan konye kitwasam ijo apiyai kanu aitolomum ibore yen ejok, imedauni ijo noi.
Abu kalom kasodi awolior ber konye ne abonguna eong, abu apedo airiun itunga lu ipu akaulo na aitolom ikososinei kede isineman lu adoketait nako kuju.

Karah Gloria na ebisi ayoere

Aicerit: Eipone bo ani kopekwana iteya ijo aram nako teso?

Karah: Ejai ameda toma ke noi kowaika, apedo eong aimedaun naarai acamutu itunga luko Teso aminun aram nako Teso.

Aicerit: Nu inyoika ainingosia idum ijo kotoma aram?

Karah: Adeka naka ekorona nesi adiope ainingosit na epol na adum eong naarai etiono adolokin itunga lu eminasi ikososinei ka ido mam itunga kere ejaasi olago kanu adumun ikososinei .

Aicerit: Ituritos itunga ikososinei ka isineman kon ido ejaasi eboliasi kitoni oredion ka osineman lu apolok ko Kampala. Ingaibo ingarakit ijo aitolom ikososinei kon?

Karah: Esialamikit ber eong eyaitone ka noi naarai abu kopedo apukokin eong aboisit na etolomia eong ikososinei ka. Esialamikit bobo eong lo ingaranakini eong akulunun ikososinei lu ikidikidete idwe Oduk itauon.

“Esialamikit bobo eong lo owaika naarai acamu ngesi da aingarakin eong noi kowai lo atolom isineman lu adoketait nako kuju luda apedosi abolia kotoma aiboisio nu epolok.

Aicerit: Ikososinei bo kwana idi ijatatar ijo?

Karah: Ajatatar kwana eong kede album adiope. Ekosio ka lo itetet nesi ‘’opuko ikekia’’ lo sek ageit eong awoyere bon konye abu Sparo Ug kilip aidomakin eporoto ke toma.
Aweyaar kwana ekosio ngol noi ido erai amuno na itunga ngesi ijaikit eong alcunun amoru nu emwaka.

Aicerit: Inyobo ipuda ijo aswam koingaren?

Karah: Akaulo ne engarere akwap, ejai eong amun na aitegiar airiamunun kede itunga tetere ipedori airiamunun kede iminan kosi.

Aicerit: Anibo araman ecie ipuda ijo aimor ayoere?

Karah: Candy man naarai arai eong adiope kotunga lu eminasi aram ke.

Aicerit: Inyobo aicoretait ijaikini ijo lucie aramak?

Karah: Ekoto kesi acamun adoketait kec mere aituputoro araut itunga icie. Ekot acakar angangat.

Karai imina ijo iyemuto lu, komorata keda lucie itunga.
Previous Aosan: Esukunyikin emusaago ke LC5
Next Ingai eraun eraban loko Soroti distrikt

No Comment

Leave a reply