PALLISA – Mam akiro nuka politiks epataka ido lu etamakitos kesi ejenete.
Ejai aibiror kede aitub ido eipone ngol nesi ideleleuno etunganan lo ejatar ka arerengu.
Ko Pallisa, arai ailel ne ejaasi itunga lu pac egananaete komakuko kwape egirigirak ko Pallisa distrikt.
Ejok teni ayakian! Arai do ketubun arereng na aterar aomisio ne ejaasi aseak nesi edeleleunotor araito nu aremarit ayakian ke Isa Taligola kotoma apaarasia nu araar apolon eicolong loka LC5 ko Pallisa ido koroko etiakuna idistriktan luko Butebo kede Kibuku.
Kenyou Taligola aitam adapit airabet, apotu itelepai ke da kodetunos aimo eipone lo asomakin omakuk lo adaunit ngesi amisiikit eipone lo aiciparit kotoma ke.
Ko Butebo, James Okurut lo arai eraban kosodi bobo Taligola aseun kwape eigirigiran loka apiyai, ajakanut kede apol na akerianut nesi abu kikatu emakuk loka LC5.
Arai abootin 13,958 kesi alemokinete ngesi omakik ailanyia Sam Keddi lo abu korapak abootin 12,419 kosodi Eriakimu Mukekwa adumun 7,559.
Okurut abala ebe aridakitos ngesi itunga lu apolok da kodistrikita konye apotu itunga ikulepek komunokinos ngesi.
Erai ngol ediope kotoma ikansilan lu abu Taligola kijaik arereng na aijaanakin kwape egirigiran komam ejeni ebe, adiope apaaran ebuni emakuk ke aibe akanin kec.
Imuriamuria Okurut ko Butebo, korocuni Patrick Duchu da emakuk ke.
Arai Duchu eraban ke Taligola. Abu bobo John Michael Okurut lo abu koburok Taligola, aitaraun ngesi atupiton ke.
Aitan aarak! Mam Okurut ajeni ebe, adiope apaaran abuni Duchu aipunupun ngesi kotoma aseo kitoni aseo na pac apotu akiro akulepek kilepunotor.
Abu Duchu kibelokin autakin Okurut kwap kede akopor emakuk akaulo adumun abootin 32,556 kosodi Okurut adumun abootin 23,996, David Apuwa Keddi 18897 Joseph Okoboi 5,829 keda Swaibu Okot lo abu konyilu abootin 547.
Ilalai Okurut, kipelun bobo etunganan ke Taligola ecie ko Kibuku. Lolo kana, arai Mohammed Nakeba.
Abu ngol na kopedo aigalalaun abootin nu ipu kanu araun apolon eicolong loka LC5 ko Kibuku distrikt.
Arai Nakeba atupiton ke Taligola. Ngesi abu kiteleka Charles Kadiama.
Okurut lo arusitoi atorob akote akerit adieket ngesi esisiau Aicerit ebe, esinapikisi amuraK ke lu ebe apotu okodakisi ngesi ne ejai ekabaka Imugwerio lo ebe abu kolimok ngesi ainapakin.
Ebala ebe, aponi kolimokinai Okurut ainapakina naarai eminangesi airiamun kede Museveni lo aticepak emina adapakin ngesi da epelu lo epedoria aipang aijar karaida egirit abooti.
Inerasi ka Aicerit, abala Duchu ebe, mam erai abeit ebe alosi ngesi atiakit itunga lu ebeit ngesi aijaanakin.
“Elosi apugan ka aijaanakin itunga kere luko Pallisa, ido ejie lo epol kakere nesi eitekerene,” abala Duchu.
Erai kwana Taligola lo emunoi bala epoga akaulo aikekeun atelepai lu
Kodumak aidules acie otoma apapula!
