SOROTI – Abwak iuni kesi ber adautu aidotun itauon kanu amariaun eicolong loko Soroti City East.
Abwaak lu kesi imoriaritos Moses Attan Okia loko FDC lo abu ekooti kopetu kinga, Herbert Ariko lo ijeko ko NRM ka Pascal Amuriat loko UPC.
Arai ti abwaak ikanyarei ejaunitos apapulai orionget lo aseo konye iuni kesi edolakisi ikorio kiding akeje.
Lu auriakata ikorio kesi; Herbert Omoding, Stephen Omoding ka Joseph Ogita lu atemasi ebe emwaka akiro koingaren.
Biyan Naebalasa, Attan, ngesi abu kodau aiwadikaun kanu abolobol ido eraasi isawan ikanyape ka atutubet kong kadunite na epolokit erionget lo aseo na oyapesi lo aseo ko Soroti City, Christine Eyu.
Edaun aiwadika, egangitok luko FDC lu engarenikit Patrick Amuriat Oboi, epresident loka epate lo FDC, egirigiran Nathan Nandala Mafabi, eraban Ibrahim Ssemuju Ngada ka MPS swi luko FDC luko Teso, Lango, Bugisu, Acholi ka Buganda kesi apotu koduosi kobalasi ebe adaun epate loka NRM.
Akaulo na Attan aiwadikaun, esirit lo egangitok epate loka FDC, kesi apotu kirimokisi etaun kosodete abongun alaro na aboliasio nako Arrow Square ne apotu koracakinatar itunga akiro swi.
Epukorete eirab kec, Attan akaulo na aiwadikaun ngesi abu kikenyak lu iyemuto ebe ejai ngesi aiwadikaun naiyareikini kobala ebe ebeit ngesi airimokin ore toni ore, ocaalo toni ocaalo kanu awanyun ebe itelekaari ngesi aseo.
Abala ebe aponi kikisarai aseo ke konye komamei ngesi airabet arai apugan kanu aigereun ikoruo.
Abala ebe ekotosi kesi aitelekaar aseo na aibosio nuko Aloet ka Opiyai naarai eroko itunga lu apotu kosekata kesi ejarete.
Abala ebe karai ejaunos imuudun mam kesi epote akurianar naarai erai apedor kec aitemokin Uganda.
Kingitar ebe inyobo ijaikini ngesi itunga luko Soroti, abala ebe
Abala Attan ebe adau ngesi apalikin itunga luko Soroti akuwan ke ido isumunit aijaanakin kesi naarai kotoma okaru ediopet lo ajaar ngesi airabet, apol ngesi ameete arima okooti ido amamei ngesi apak na aijaanakin itunga kwa aroikitor ngesi Ariko lo abu ngesi kilanya okaru 2021.
Abala ebe erai nu aumokin Ariko amoromor nu adautu itunga ikulepek aitutub kobala ebe pac ne abu ngesi kibiror okaru 2011, 2016, ne abwoitotor Ariko (2016) ka Mukula (2011), mam ngesi abu koyanga idio kakesi okooti.
Etoronaarit Mike Mukula lo erai atupiton ecaman loko NRM ko Kide nako Uganda kanu akudokite ngesi etau.
Abala ebe pac ne etolosere aseo okaru 2021, abu ebe Mukula kitiji Calvin Echodu, lo abwoi ko Soroti city West, Julian Iseet na abwoi ko Soroti City ka icie.
Konye ngun kere epegaarit Mukula kobala ebe ejai ngesi elopet aijaanakin ateker na Iteso ka aitekooro.
Patrick Amuriat ngesi abala ebe itei ngesi ebe edaun aswam na.
“Itei ber ijo ekwenye da itodiei ebe edaun aswam na,” abala Amuriat.
Abala ebe ejaasi kesi aisup aseeta kainapaara ido mam ebe eponitos ejie.
Abala ebe arai eomit NRM ebe epote akoko aseo ekwenyete kesi akuware keda apaaran.
Abala ebe mam kesi ekotosi abukor aokot konye mam kesi epote apalar aibwo karai aisokok karai esurokin kesi.
Kobala ebe ejai kesi apedor na ajaut ka aswam iboro ko Uganda.
Kanu apak na edite na ijaikit kesi erionget lo aseo abala ebe erai ngun ainapeta nu edaunitai apesikin kanu aitam airiebun kesi naarai ejenete kesi ebe ebeit kesi aitelekaar.
Abala ebe ejai kesi etiimu lo elangir naarai erai Soroti City East aiboisit ke ido aseo nako 2021 abu ngesi kotub ejok.
Ecaa Amuriat Mukula
Kingitar ibore icaaritor Mukula, Attan, abala ebe erai Mukula lo emoot ikapun ido ebe erai esubusi ido ekot itunga kere apalun ngesi.
Abala ebe mam erai aswam naka MP aitala etaun, aiduk adekesia karai aiduk irotin konye erai aswam ke abwoikit itunga ke airabet.
Abala ebe mam nu Mukula itetiak ido emojongitos naarai mam epedori ngesi.
Mukula ngesi aponi kilanyai okaru 2006 loatwan Charles Willy Ekemu, ido edila bobo ekesa je eibwonga ebe erai ngesi emoru loko opiyai ko Soroti, ido amamei yeni apedori aukor ngesi konye edolu aseo, apotu imirio ikocosi emoru toni agiamaikin kwap ido abu kotwania araut eminista locici lo akiro nuka angalei ido akaulo aponi kokacunai kosodete aiturakin aidaris nako Luzira ido arai Amuriat, Ochola ka MPs lu etepegete apugan, kesi apotu korimaata okooti kanu alakun ngesi.
Abala Amuriat ebe mam itunga ekoto aumokite nuke Mukula naarai erai emong lo adautu kesi aidongor ido emoi akoik ke bon.
Pac apapula naka Aicerit ngesi abu kongesakin arat kiding Mukula ka Amuriat ido erai arat na esil na iriengun bala idwe lu emariate emududu lo airegiem nu esanyuse.
Adakunos luko NRM
Mike Mukula lo irukosi luko FDC, ngesi abala Naiyareit akaulo na Ariko aiwadikaun, ebe epol ngesi ailel kanu alacakin ka aitodikin itunga luko Soroti, kanoinoi luko Kide nako Soroti, abwaan kec konyaritete Herbert Ariko lo adau epate asekun kwape lo ibwanenit emedera loka NRM kanu abolobol kwape MP lo ebwoikini ebuku loko Soroti City East.
Abala ebe erai na aijulakinet na egogong kotoma opolitiks luko Soroti City, ido erai na apak na itunga luko Soroti asekun etopolon.
Abala ebe ipu ainapeta nu ebe mam epacunitai kotupitete ebe eingarenone lo mam etekooro.
Kedau Mukula apacakin lu iyemuto Ariko, abu kocamak ngesi einer, konye kwape lem sek amameete nu itegelikina nu enera, abala Ariko koiner ke ebe; Ikiroria ke kesi lu elimoro ido ebe ekot ngesi aisialamikin Lokasuban kanu ngesi angetakin amairo nasodit na aiwadikaun kwape lo eboloboloi.
Abala ebe erai eipuda loka epate kec lo NRM awanyun ebe ejai apol na itekooro, ido ebe mam ekoto akiro nuka politiks ko Soroti kitoritere akiro nu aisab ka aipwok lucie, ido ekot acakar ngun.
Abala ebe ejaasi ngesi ka ipiirin iuni kwape nat aijar na itekooro kotupitete nu epesikitai ido ebe ebuni ngesi awanyun ebe etupio nu edaunita apesikin kanu apol nako Soroti City.
Ariko ngesi ber ajai FDC, otubor aigang Mugisha Muntu, kosetar kwapo Obonipe, ido akaulo na ailanyio kolomari NRM ne kwana ebwoia. Konye edou ngesi abu itotolik ainapeta.
