PALLISA – Itunga lu atutubet kana Kacede Cell ko Kibale TC ko Pallisa distrikt kesi kapaaran Naikanyet abu etasuro kirum ebong.
Kosawan itomon lu abong, apotu koriengutu icweikin, Harriet Beatrice Apolot kotogo kosodi aidopor cut.
John Ogwang, apolon eicolong loka LC1 lo Kacede ngesi abala ebe, abu Apolot komiedakin kojaasi ebworok oreke kwape atwanitor akooke na ebe, Sarah Agwang.
Ogwang ngesi abala ebe, kokau bobo ecweikitor Apolot ecie etogo ebe akoto ngesi atwanikin keda idwe ke kere iyarei konye apotu itunga orurukata
“Erai esirani lo itegelikina atutubet kosi noi. Mam akiro eipone kwa kanu eraasi nu isialamikitos isio cut,” abala Ogwang.
Konye Ben Oidi, atumunan lo atutubet ngesi abala ebe, ejari lem na atwan koipone lo icogoror noi naarai enyame da ationo ido kojarete lem keda ekurut lo eseny kosodi apalun atupakin ailik ikee kede akwamakin amat.
Lawrence Omonga ngesi abala ebe, korai mam Apolot idulokina toma akiro nu amat koricite atupakit nu adekis, ti mam ebilakina togo naarai okilinike icogoror ejautene.
Konye Simon Aupal okilenike Apolot ngesi abala ebe, edumakitos ngesi akiro nu atwanare na aberu ke osenta lo Okoona ecibanari.
“Kadol eong ore, mam nu ajokuka naarai abu etogo idopo keda iboro kere ido mam ngesi ajeni ne egeunet. Ebakai ebe mam Apolot ingarakinitai konye atamit lem eong kotoma adoketait kam” amonyi Aupal.
Eyatakit ebe, ayanganari lem ngesi adekesia konye alope ngesi abu kogir ailik ikee.
“Abu alope kogir ailik ikee naarai ebe, akoto ngesi alope aiyengun,” abala Aupal.
Cecelia Anyoka ngesi abala ebe, abu ikoku kolimok ngesi ebe, abu Apolot kingalau ikoku aikopakin ngesi akibiriti.
Eyatakit ebe, abu na atwan kijuka ikoku Kolir ido apak na edit kopuruni etogo kede alope asisior kotogo.
John Julius Okaki, apolokiton nu aisinapinikin adekak aomisio k’adekis na Kameke HCIII ngesi abala ebe, adekak eseny ngesi edolit acamun nu adoikisi awate kec mere ajaut kede aomisio nu atwanikin.
Eyatakit ebe, ekot itunga lu ejarete kede ekurut lo eseny aitup aicoreta nu elimonokinete ipiriotin kede kede acamunit ailik ikee kanu aijar adaun ikaru lu ipu.
Umar Mugerwa, apolokiton ipolisin ko Pallisa ngesi abala ebe, apotu kesi kitojokasi ayangar ates adekis nako Pallisa kanu awanyanar kwape ipudar ekisil.
“Bobo da kwape eraar na atwan aberu na mam Aupal da ajeni aiboisit na elomunitor ko Teso kwape eriamunitotor kesi Kaboloi apedorete ipajan ke adumun eripoota lo adekis.Ecorakini itunga icamanaros ajenun aibo elemunitor idiopet,” abala Mugerwa.
Ekisil nesi imarunit amiedakin kwape abilio na ekisil. Ipolisin kesi kwana ejaasi aitolot aingic.
Itunga lu ejarete kede ekurut lo eseny kesi ekotosi aisinapinikinio tetere mam kesi edumunete aomisio bala mam eminai kesi kosodete amiedakin.
