SOROTI- Imurok lu adekis na apolon nako Soroti, kesi alimoros ebe ikoku idiopet yen atiakunete kesi kane ejai yeni atwanit, ngesi esipo angaleu ke ido mam bobo aijar ke ejai oitelesit.
Olap je idokitan ko Soroti kingarenikite Dr. Joseph Epodoi, kesi apotu kojenagta ka aitiak imuu lu emorikikina kotwanite idiope kadikis na iyogiyoga ko Soroti.
Idwe lu kesi auruuni Joyce Alinga 21, kadekis na Amuria ido akaulo na ajengun ngesi idwe lu ido kewanyun ebe itegelikina ejautene kec, aponi kitojokai aijukun kesi adeki na apolon nako Soroti.
Konye imurok ber luko Soroti, kesi apotu kitojokata aijukar kesi adekis nako Mulago kanu atiako, konye kedoloto kesi Mulago, mam aponi kijaarai ejok ido apotu imurok kangina ebe kirutasi papake Alinga.
Abu do papake Alinga kitojoka ainyakun idwe ngun adekisi nako Soroti.
Kejenu eyaitone lo adekis ngun, apotu imurok kingarenikite Dr. Epodoi, kiboikinos aurianet na amwana ido abu Epodoi kocam aingarenikin ipaupa ke kanu aijeng idwe lu amoritos atorub, emanyi ka akoik.
Teni Naiuniet, eraasi 26.03.2021, iyemuto kesi apotu kipelunos kinga kituritos Dr. Epodoi ka etimu ke kanu aiswamaun nu aumokin, ido apotu koraunos ainerasit na akwap kere.
Eraasi 07.04. 2021, airabet nesi abu konyara Epodoi ka etiimu ke kanu aitur, ido erabasi kwanata, MP lo obuku loko Kasilo Elijah Okupa, kanu aikeun nu itamitama, kobala ebe; Toto Aeraban abwoi kane kanu aikeun nu itamitama kanoinoi akiro nu aumokin nu apotu imurok luko Soroti kisomautu kepedosi aijeng idwe iyarei kotwanite idiopet lu aponi kongeroi adekis nako Mulago kitoni aitajar.
Kobala ebe inera ngesi kotupite ekisil lo airabet 55.
Abala Okupa neta; “Kotupitete ekisil lo akwap wok ebe ebeit apugan aijaanakin amukian ne ejaasi itunga ke, ido, ebe eraasi 22.03. 2021, Loyce Alinga, na Aojangor kotem, Obalanga koditrikta loko, Kapelebyong ngesi abu kidou imuuna lu emorikikina kadekis nako Amuria HCIV IV; Kajenete kwa ationor ajengio na abeit aitolot kanu aitiak kesi, apotu imurok luko Amuria kitojokata aijukar auriak ngun adekis na apolon nako Soroti, ido aponi bobo kijukarai kesi adekis nako Mulago kanu ti aijeng ka aidar.
Ekoni einer ke Okupa nen ido apotu MPs kere kogeutu ber aitoron esomak luko Mulago kobalasi ebe apotu kodiakasi kolomakinete aiturite lukec Epodoi
