KATAKWI – Kicak ijo adio aiboisit ko Uganda inerasi itunga nu Emyooga!
Ne ageunotor akiro nu Emyooga, asubit bala aria eyala konye ejai kwana abeit anganyun.
Ko Katakwi ageu edistrikt aipenanar itunga lu ebeit aimedaun kanu acoikin kane ejaasi lu obebera.
Ainapeta nu esipokitai kanu aitiji ekadakada lo aswamisinei kede etidot lo ibakor kane ejaasi itunga lu egelegela, kesi elacunitor apugan sh1.5bn kanuka Katakwi.
SACCOs nu ebeit aimedaun kobukui kwapenat; Ngariam, Usuk, kede Toroma kesi ebeit aimielanakin kanu apiyai kangun. Kotoma aimedaun kangin erai SACCOs lu edolitos 51 kesi ebeit apolokit apiyai ngun kadoketait nako distrikt.
Naikanyet itutuorio engarenok luka SACCOs, aponi kicorakinai igurupun acoikina itosomao apiyai.
“Karai mam yesi icoitos itosomaete apiyai ngun, ebuni Nakalema airid yesi,” abala Simon Peter Egiriat, apolokiton ainapeta nu ko Teso kotoma aingadis naka Micro Finance Support Center Soroti.
www.aicerit.co.ug | Na Emmanuel Olinga
Eyatakit ebe, mam apiyai nu Emyooga eraasi nuka politiks konye eraasi nu apiyai nu itebeikitai aikisaria ibakor kane ejaasi itunga. Kotoma ainapeta nuka Emyooga, ebeit aikopanakin atukuno nu kotemwam apiyai ngun do ainyakun kede adokon na 8% kotoma okaru.
“Ekot politicians da amisiikin ebe, mam apiyai nu eraasi nu atitai konye eraasi ikapun nu irimirimete ne ejaasi imeeban. Mere aigalagal itunga kanu abotin,” ecorakit Egiriat.
Eyatakit ebe, atwakata SACCOs ko Teso naarai ejaasi itunga lu eraasi lu obebera ido imojumojuna icie kotoma oyaitene loka SACCO.
Etacaunit ebe, ibore yen ayarenen SACCOs nesi; amidicio na apiyai, eranga kane ejaasi ayaitok luka SACCO kede imeeban lu ebood loka SACCO.
“Kocoitos lu obebera. Epote moi icie ituputoro bala emanimanak lu ainapeta kanu kisosuikitos bala ekotosi aikopaun apiyai konye korai apeleikinet akokuar apiyai ngun,” abala Egiriat.
Patrick Todi, lo eyait nu agwelanar ko Katakwi distrikt ngesi abala ebe ebuku Ngariam nesi ejaasi SACCOS 18, ebuku Usuk nesi ejatar SACCOS 16 kede Toroma 17.
Ejaasi atukono nu edolitos 500 koitelai keede otemwan ido aponi pac kodaunai apukonor akauntan nu ebeit aremokin apiyai ngun.
Aingadis nako Opportunity bank nesi engaditere apiyai ngun kere.
Eyatakit Todi ebe, SACCOs luka; iderapan kobuku Usuk, arotak iyemuto kobuku Usuk keda arotak iyemuto ko Toroma kesi ber eroko imangimangasi kanu adumun apiyai nu.
Ejaasi igurupun lu imoriaritos; Boda-boda, ikulepek iwoteerin, ingwalasik, esubusak nu angor, ekeok, etekerak amotokan, aramak, ecipak itim, ipaparasin kede imwalimun lu isisianakinete osomeroi lu mam eraasi lu apugan ejaasi icie da.
Ebeit kangin SACCO adumun apiyai sh30m.
Pac inera k’arii nako Nyakoi, abala President Yoweri Kaguta Museveni ebe, ariino kesi esipokitai arita nu edolete sh50b kanu Emyooga .
Micheal Bwalatum RDC Katakwi korai da arucokiniton ainapeta nu Emyooga ko Teso ngesi abala ebe, adolutu apiyai nu ido eyapesi lo epresident ngesi mam duc esabenenei karai ekoto aitodolikin ibore.
Francis Otim keda John Patrick Ekalet, apolokitok SACCO lo aipit agaria ko Ngariam ngesi eyalama apupun akiro Emyooga kobala ebe, edolit apugan aitodolikin apelekinet na aikeun itunga kotoma obakor.
Deborah Itana, engadan apiyai ko SACCO ediope ngesi abu kicorak itunga acamun aitup eipone lo aitopol igurupun kec. Eyalamasi itunga kidaretos awanyun apiyai!
