KATAKWI: Itunga luko Katakwi kesi enguurianete kanu aronis na irotin kec kede ekadakada lo ikee kotoma adekisia.
Basil Ongonok, egirigiran lo apolon eicolong LC1 kocaalo lo Ajamaka kotem magoro ngesi abu kolimk Aicerit ebe, amunaros konye irotin cut kwape ejatar engarenok aicasit aimo abootin.
“Ekotosi irotin apodokino noi konye elilingata engarenok kere. Icie irotin kesi abu edou kilota konye mam itemokitai,” abala Ongonok.
Abala Ongonok ebe, abu apugan nako kiding kijuk acuuman kanu aisoma irotin konye mam isio iwanyunit acuuman ejaasi aswam irotin.
Ekeunit ebe, ejai ationis na irotin konye eculakin ikumemei bobo ationis na ekadakada lo ikee.
“Ikoto isio ikee. Kangin apaaran na ilosio isio adekis nako Magoro LCIII elimokinio isio ebe, emamete ikee,” anguriani Ongonok.
Alice Turuke, adonyon igoen ko Senta lo Magoro ebe, mam bobo amamus na ikee erai ibore yen itet.
“Mam eong apedori adumun amukian k’adekis na mam erai na apugan naarai eroikitos eong ibakor ido kopol ebeei lo ikee,” abala Turuke.
Etacaunit ebe, adumun amukian k’adekis na mam erai na apugan kaiboisit ke nesi ekoto nepetai sh15,000.
Loyce Ariong, na kocaalo lo Apeleun kotem Okore ngesi anguriani ebe, karaida eroko irotin ido komamete ikee, konye emamei kesi adekis da kwa aiboisio acie.
Etacaunit ebe, kanu adumun amukian erai alosit kitoni Magoro arai Ngariam.
“Kwape itunga lu kotem Okore esubit bala angau atiakuno na etem atiokisio nu ipu naarai emameotor etem kitoni adekis na didi da,” abala Ariong.
Etacaunit ebe, anyoun ko Okore kitoni Ngariam nesi edoli 8Kms ido aidol Ngariam nesi edoli 9Km.
Apotu imurok kogiroto einer ka Aicer naarai ebe ejai apedor na einer ne ejai apolokiton ajakanuto.
Saraphine Alia, apolokiton ajakanuto ko Katakwi ngesi abala ebe, edumunit edistrikt ikee pac ido kocamunite ebe, emina araun abeit ebe edauna lu eimidi naarai epol eimidi ko distrikt kwape etepia edou.
Eyatakit ebe, edumunit edistrikt sh1bn kanu irotin konye ainingosit nesi idoon lu emunamunaete irotin. Amonyata itunga luko Katakwi akiro nu irotin noi.
