KUMI – “Ne ebwangunotor ican, eramunete ipajan, ipaparo ka amurak. Kitema ijo emamei ne iboikino, ecamunitos araut lu idanya wos.” Ngun kesi apotu kisomaunos ko Kumi ne etolosioto ipatei aseo kanuka LC3s ka ikansilan kec.
Aseo naka LC3s ko Kumi nesi abu koraun na etegelikina opol aibuk akio
ebwangun amumu aseeta swi ibore abu oyangau aikisanario na aseete acie
otupitete akoko na abu ojaun toma aseeta oipone lo itunga abongobong aise aseeta nu edeparitos aarei.
Kotoma Kumi Municipaliti aseak luka Aoloko keda Olungia cell ko Olungia
Ward ko South Division, nesi apotu egangitok ke John Bosco Emenyat ka luke Paul Ekwaru oretokinotor neda apotu itunga obelebeleunotor
ido arai ipolisin kesi apotu oyuutu icie lu aiete aokot ror iyengasi atwakikin konye ekaulo abu lo ayait aseo kolimo Emenyat kwape etelekaran ekakau abootin 3,880 ailany Ekwaru lo abu odum 1,181.
Abdul Aziz Ongodia ngesi aponi olimorai kwape lo edakit emeedera loka LC3 kotem Kumi ekakau abootin 4,748 ailany Robert Orode lo erai eraban ke okansulo.
Ongodia ngesi ikwenyarit itunga lu ekotosi atiakit luce koipone lo aicuk amumu. Orode ngesi abala ebe egangitok ke nesi aponi itukurianitete dimi ekuriakaros aisek ngesi.
David Esele ngesi aponi olimorai kwape etelekaran lo ibwoki emedera kotoma North division ko Kumi Municipaliti akaulo ailanyar Sam Opus Okodel lo lem arai LC3 ka atupiton ke Julius Oumo.
Kotem Atutur Imongole Shafiq, ngesi ilairai ebe mam ngesi ebuni apalar
aibwo naarai abos epate loka NRM imuarite eipone lo aponi ikisarere aseeta nu aiboisit na elomunitor ngesi ebe ajai amumu toma ibore abu oinak ngesi adumun abootin 2,124, kosodete alimor Patrick Ekoot, kwape lo etelekaran akaulo na adumun 2,493 neda ebala Omongele ebe aiboisio kere ajai akoko keda amumu ilairai ebe arai mam NRM iteteni nu aseo nako puraimaris ebeit itunga ainac epate koingaren.
Kotem lo Nyero kwape nesi aponi olimorere atumunan Max Gilbert Okou kwape etelekaran ekakau abootin 3,653, osodi ailany oupake Francis Emoto lo abu ongedu abootin 405, Okou ngesi abu kilip itunga luko Nyero asalakin imorikikina itoni aseo na awasia neda ebunio ngesi autakin keda abwaak icie lu elomunitos opatei icie keda lu obonipe.
“ingadakisi ibelai ngupongun itosomata aibelibelio ikesangun,”
abala Okou. Chilakol Ben ngesi aponi olimorai kanuka etem loiteten loka Tisai abu odum abootin 520 ailany Charles Emmy Okwii lo abu iraru 460, ido Chilakol ngesi abu isialamik Itiisa kanuka amunokec kosodi ailip kesi aisal imorikikina tetere aitopoloun Tisai na adau ikaru erai ailatoet naka engarenok.
Kotem lo Kanapa nesi aponi olimorere David Ogira egiriau abootin 2,279
ailanyia David Arikodia lo abu olidu 1,752, ido ikunyukunya abongun kwape obonipe.
Kotem Ogooma abu Joseph Oren iteleka etuku abootin 2,637, ailany Emmy Okello 959 lo kopekwana igugunaarit eibworo oyapesi loko NRM itoronitete eipone lo aponi itolosere aseo na abala ngesi ebe aponi ibungai itunga ke ibore ainakini ngesi atwaniar.
Konye Oren ngesi abala ebe erai ngun amamiak naarai ngesi ti abeit ayangaar anguriana ke oyapesi lo NRM naarai aponi iritokina ngesi kanyamas lu atamitos aitukurian itunga ke.
Kotem lo Ongino, aponi kolimorai Stephen Okwele, kwape etelekaran akaulo na ngesi adumun abootin 12,199 ailany Lawrence Ochanya lo abu odum 924, kosodi Charles Aisu lo lem erai LC3 aisal aingito kobala ebe abu ngesi kodekakin konye ebe ebuni kwana apetokin kede kakasi
awasia.
Ko Mukongoro aponi olimorai Charles Okodos kosodi Eruket Mulingakanuka etem loitetet lo Kadami kosodi Otua Aduo akwap kanuka etem lo Kakures ido lu kere kesi ejaasi iyalamasi ido ilipitos ikec itunga ebe imorikikinos eriasi emedera toni angeset naka elaagano.
Kotem lo Kamaca, apotu akiro igurukinotor, akaulo lu epolokitos aseo alimor Asumani Odong osodete ainac Justine Moses Asire lo lem arai edaran etem kwape LC3 ibore abu koinak itunga lu Kamacha aidiyaun
Naikanyet oyapesi loka NRM ipudasi ebe olimorai Asire naarai ebe akaulo na elemar aseeta nuka aseeta nuka Kamunyumbi keda Katilekori kanu amumu neda ajeni ejakait Obuya Sam lo eyait nu aseo konye ebe abu Bobo olimo Asumani kwape etelekaran ekaulo na bobo aitemun ai arakin ngesi aseeta nu Kamunyumbi osodete alemar aseeta nu asetait na Olumot ne amamei amumu ido ebe eseitos itunga ojai ayuwara da.
“Ikoni bo lolo akoko itunga kalu ai okwe apele cut akoko paaran, cabo lolo iutasi yesi aswam ikapun da nupo cut idelelete da yesi aijulakin okwe,” autonokinete aseak lo eyait aseo oyapesi loko NRM ko Kumi akiro.
Aseak lu apotu ibatutu keda akeje ko Kamacha onyuyurasi kesi apotu olukasi eyapesi lo epate okotosi ti adongodong lo eyait aseo toni ebe alimor
Asire kwape etelekaran.
Asire ngesi abala ebe apaaran na aseo elemar aseeta nu aiboisio aarei, Katilekori Catholic Church ka Kamunyumbi abu ngesi iteleka otoma aiboisio 14 kere konye akaulo lo apolon aseo alimokin kesi ebe itemokinio akiro kec konye mam akiro nu apotu kocautu.
