Akituk nu edolete 129 nu pac abu ajore naka UPDF ka ASTU kikamutu kesi koponi imikarai Iteso kodistrikta kalo Moroto.
Itunga lu adeparit enaaba 35 kesi pac alositos aibwap akituk kec nu lem ekokoete ikaramoja kodistrikta kalo Katakwi.
Apolon eicolong loka LC5 ko Katakwi, Geoffrey Omolo, lo da engarenikit etiimu lo, ngesi obu olimok arotan iyemuto kosi ebe, obu ajore nako Uganda na ejai otem Lorenegechora ko distrikta kalo Napak kesi ebe, ekamunitos kesi akituk nu edolete 129 kotem kalo Nabwal koditrikta kalo Napak.
Eyatakit Omolo ebe, obu ngesi keda eingarenone loko distrikt koramutu itunga lu ewomitai ebe, ekokotai ibaren kec anyoun okaru lo 2018-2021.
“Obu etiimu lo itunga lu ekokotai ikec ibaren koloto ne atukokitai ibaren kotem lorengechora neda opotu itunga ojenatar akec akituk lu edolete 84,” eyatakit Omolo.
Eyatakit ebe, ejaasi aiboisio nu idila alimunun ebe eyanganaro akituk nu ekokotai koteso kwapenat; Nabwal, Dwol, ka Katale ko distrikta lo Napak.
Prisca Loyol, na erai atupiton LCV Napak ngesi obu olimok apapula na ebe, mam kesi epote nepecepe da acamakin Iteso ayangaar ibaren lu ekokotai eroko kesi elomuna oyapesi kolap kaloikanyet.
Eyatakit Loyol ebe, anyoun ne alomaratar kesi oyapesin lu kopana ejaasi kesi, ipu imusaagon lu akoko na akituk kodistrikta ibore yen ijaikit kesi emame aiyengun kotoma ayuwara.
Ejai ajore na UPDF, ASTU, LDU ka icie da odistriktan lu idunyatar Karamoja aimoriarit Teso, ekwaikinete bo ikaramoja ekokounete akituk koteso toni adolun Napak, eyatakit Loyol.
Ojirot Emmy, LCIII lo palam, ngesi abala ebe, opotu itunga ojenata akituk nu edoli enaaba 64 eraasi 27/07/2021, neda oponi isirikinere kesi alosit airiamun kede ikaramoja lu lem idarete ibaren lu.
Epapula na ngesi engicunit ebe, ipu itunga lu etwakiaritos ibaren kec ne ejaasi ikaramoja lu engasete ibaren ko distriktan lu idunyasi kede Karamoja.
John ogwel, lo erai LCIII lotem lo Nabwal ko Napak district, ngesi obu iningo ajore kobala ebe, “ingai bo ejaikini Iteso apedor na aibwap ibaren toni Nabwal ka Lorengecora?”
Eyatakit Ogwel ebe, idio itunganan yen ejeni ibaren ke, edolit alimokin kesi apaaran na ekokotere kede itunganan yen ekokot.
“Ejai isio epone lo ibwapere ibaren lu ekokotai, nasodit, ayangaar eripota ne ejai ajore, ibwapakini ajore ibaren ngun, aria etuboro odistrikta iecie, ikopakini ajore, ajore na odistrikta kangol aibwap toni ne edumunere ibaren ngun,” abala Ogwel.
“Mam isio icamuni ibaren lu ekokwaritai erongo isio ilomara oyapesin ngul. Icamuni isio iteso ayangar ibaren lu ekokotai anyoun olap lo ikanyet toni kopana, narai mam isio ijeni ebe, inyoni obu isomaikin oingarenone lo okau tetere mam akituk ngun mam inyakakitai ikupelek lu eraasi iteso.”
Ekansila lo Palam, Abdul Okeng, ngesi obu olimok arotan iyemuto kosi ebe, “arai ikoto ijo araun engarenon ko Karamoja, ekoto ijo orai angatan ibaren.”
Eyatakit Okeng ebe, erai lo eipone ediopet lo ejariatar ikaramoja kwape epelu kec lo emaniatar kesi ejautene lo angina paran.
“Ilipit isio, eingarenone lo Katakwi apugan akoru irotin lu ayuwara okoruo lu ejaasi kidding Iteso kaeda ikaramoja, ibore yen itidisiari aingat na ibaren ko distriktan lu ikoruosi keda Karamoja.”
Ejaasi ngun da, lo epoloikit aingic ko ajore naka UPDF ko 403 brigade lo ejai Matany ko Distrikta kalo Moroto I.O. Mjr. Rashid Mujuzi ngesi obu kolimok Aicerit ebe, ejaasi kesi kwape ajore na idari itunga ka iboro kec, ibore yen mam ijaikit kesi egonganaros aria ne ejaasi ikaramoja aria iteso.
Eyatakit Mujuzi ebe, obu ajore nako UPDF oloma toma omoru lo mam lem ikeyarin da ejenete bala iboyete itunga kotoma neda adumunere akituk nu edeparitos 129 nuda ewomitai ebe akokotai, iboreyen obu ijaik ajore aisirikin eingarenone lo Katakwi abunore aijen ibaren lu edumunitai.
Ikote akiro nenda, ekatekist lo akelesia nako palam Joseph Aede, ngesi ediopet kotoma otunga ikanyangon lu opotu ojenata ikec ibaren, abala Aede ebe, opotu ikaramoja ongatasi ekemong ediopet lolem ingarakit ngesi akoru.
Obu Aede itorona eingarenone lo Napak kanu aimikar itunga lu ekokotai ikec ibaren.
I.O. Rashid Mujuzi ngesi obu otema ebe, Ibaren lu oponi imikarai iteso kesi eponio aijaikin ne ejaasi ikaramoja lu lem idarete kesi naarai obu eingarenone lo Napak ogirio ibaren lu ekokotai ko aipuganasia nuko kau.
