KATAKWI – Atumunak luko Katakwi kojaasi aibunget naka Activista Uganda ingarenikite Actionaid International ko Uganda, kesi apotu olekata Ateso ne ejaasi engarenok kec.
Ekansila lo atumunak, Stephen Otukei ngesi abala ebe, ekoto apugan aikeun eiriago lo atumunak naarai kopaana, edumunenei edistrikta apiyai nu atumunak nu edolete sh1.17m bon kotoma olapio iuni.
Eyatakit Otukei ebe, mam apiyai nu epedorete aswam idio ibore kane ejai ekansulo lo atumunak naarai ipu atumunak noi ido da kokupup.
Apiyai nu kesi edumunene edistrikta korionget lo eipamorani k’akwap wok ido icie irongeta lu isomanara kede atumunak kwapenat Actionaid , ngesi ecie pone lo edumununata atumunak agangan ko kansulo kec.
Isaac Ogwang, ecaman lo atumunak ko ditrikta kalo Katakwi ngesi abala ebe, etiono ekansulo ke aiboinikin naarai emameete apiyai nu ebeit aitosom kotoma apak na iboikinor ekansulo lo atumunak.
Ilipit isio iyatakinai apiyai toma oiriago tetere atumunak ejalete aswamisinei nu ebilibilete ikisila.
Atumunak luko Katakwi kesi oputu itoronasi iprograms lu apugan kimoriaritos eprogram loitetet lo ebeitor itelai adumun sh100m kangon ikaru lo apiyai kakwap wok.
David Anyonga, atumunan lo otem kalo Ongongoja ngesi obu olimok apugan ebe, ekoto isisianakinai itunga lu otemwan eipone lo ebeitor eprogram lo alosio.
Eyatakit Anyongan ebe, ebuni moi apugan aicanican apiyai koboro lu mam itunga ekotosi kwape nat eprogram lo atumunak, Emyooga, entandikwa ka icie.
“Idumuni ijo ebe, ebeit apiyai awolionor kobakatete ebe, itosomatai aitutuoro ne ejaasi esomak lu apugan ibore yen ijaikini apiyai mam adolere ne ebeit,” abala Anyongan.
Emuwar atutai
Proscovia Aloket, egirigiran na atumunak ko Usuk TC, ngesi abala ebe, ejai kwana apugan aibok atutai oitelai lu ipu kitosomaete da apiyai nu ipu noi konye ebe, mam atutai nu epote aswam idio ibore.
Eyatakit Aloket ebe, “ejaasi amatutan nu aiboisio nu egelegela ido mam isomaete ibore yen ijaikit isio atumunak inera ebe, aiboisit na apugan aicanican apiyai kotoma oboro lu mam ingarakinete, iyatakinai eiriago lo atumunak ka aitutuor atumunak lu apotununutu koreria koroko esiomete.”
Adeke Ann, ngesi abala ebe, edolit apugan apukor isomeroi lu etatai ko distrikta naarai ipu atumunak lu mam ebeit abongor osomero kepukor isomeroi.
Apotutu apesur nu edeparete 5000 ko Katakwi.
Moses Kakembo, emeeba lo Activista Katakwi TC, ngesi abala ebe, ekoto apugan aigang aicurus na atumunak.
Steven Otukei, ekansila lo atumunak ngesi abala ebe, ekoto apiyai nu ijaikinai atumunak aitutuoro
adumun acowa na etatai ko distrikta.
“Ijaikini ngin atumunak itegearete aiman kec komam eraasi itunga lu itoronitai kowaitin lu ipu,” abala Otukei.
Ikote akiro nen da, LCIII lo otem Ongongoja, William Omeke, ngesi obu kilip Actionaid ayangaunun RDC Katakwi, John Stephen Ekoom airabeta kwanat kanu tetere ebongonikini akiro nu icanete ateker nako Katakwi kikamunitos alupok, esolo, isokonin lu mam apugan ejeni ka acie da.
Eyatakit Omeke ebe, kwape eingarenone lo Ongongoja, ejaikisi kesi imulalo apak na edit kanu anyoun alupok nu Iteso.
Ejaasi ngun da, Benson Ekwee lo epolokit PAC Uganda, ngesi obu olimok atumunak ebe, awadikaikin
eyapesi ke ebaluwa lo itodunit angurian kec.
Obu da ilip, Actionaid aijaikin atumunak airiamun keda engarenok kec lu odistrikta tetere kesi edumunete abongonokineta.
Dpc lo distrikta lo Katakwi, David Wills Ndaula ngesi abu kiman atumunak lu itosomaete elago amoromoro engarenok kec.
Eyatakit ebe, ebeit atumunak ngun aitereikin kede ekisil lo akwap nako Uganda.
Mark Raphael Ojakal, lo erai apolokiton aibunget naka atumunak naka Activista ko Uganda, ngesi obu kolimok arotan iyemuto kosi ebe, erai airabet na atumunak eipone ediopet lo ikeunanata atumunak akiro nu iteete kesi bala iguikit eijanakine kotoma aiboisio kec.
Eyatakit Ojakal ebe, atumunak kesi ipu noi kotoma akwap wok, ibore yen ijaikit kesi mam imonikina eijanakine lo akwap kec.
Sheila Apiny, na erai co-ordinator Actionaid International Uganda Katakwi cluster ngesi abala ebe, mam na erai aiboisit na emoromoroere engarenok konye erai apwakun eipone lo itetenaret eisomae ka ejanakine ko distrikta.
Eyatakit Apiny ebe, kwape eraatar nu apaarasia atomon akanyape nu esomae lo ajokan, aitiji ecamusana ko yapesin, eijanakine lo ajokan kotoma akwap wok, ejai Actionaid ijaikit itunga luko Katakwi apak kanu einer ka engarenok kec.
Airabet na ngesi obu ojaikinos etem Usuk kede Toroma ido kopol ailek akiro akiliok.
