KATAKWI – Kedaun aseo, erai eilel kede aiyalongong nesi esali irumit abwaak!
Eraun aibwaikin aisumuneta toma aswamisioit kanu ameda na itunga ido ngun kesi abu engarenon lo ediini ikenyanak engarenok lu seuna ko Katakwi.
Arai aicur eijir lo amwana pe! Abu Jethero Ilatum, ediope kotoma omulukai luka ekanisa loko COU k’Aanyanaret nako Soroti, kilepilep engarenok lu seuna araun lu epote ayongit apedorosia nuka itunga.
“Mam ijalakinete isubusin epote amodomod akoriok. Ekot akoriok lu koraasi lu mam epote angurian kede aijulakin aomisio kec kosodete aimuwar asekunio kus,” abala Ilatum.
Eyatakit ebe, edolit engarenok lu seuna acamun atupakin aisumuneta nu apotu kesi kijaikisi aseak kec.
Enera Ilatum kotem Akoboi kotoma asuban nu ajaar Jorem Obukui, apolon eicolong loka LC3 lo seuna, aisialamikin aseak kede Lokasuban kanu aijaikin ngesi arereng na aitub.
Eyatakit ebe, “ekot engarenok ayuar akoriok kwapenat; lu emwogo lu eminasi isubusin amodomod kede eipone lo ipimaata iboro kec. Biai eyangara akorion epuko ediope lo emwogo osokooni do konye isubusin aipimaun akalayan auni bon?”
Eyatakit ebe, ekot engarenok awanyun eipone lo ayuarit aseak kane ejaasi isolosinei lu ejaasi aikeitoi kangin apaaran.
“Kanu abolonor kontrakts, ekot yesi aijaikin arerengu ne ejaasi itunga lu kore,” abala Ilatum, kosawan lo ajaar aijirijir eijiri ne ejaasi akwat lu itunga lu enotara Akoboi kanu aimor ainumunum kede eminat kec Obukui.
Kotoma asuban kangun, abu Obukui kisialamik itunga kanu aitwasam eporoto kec kede ailajara kanu asekun ngesi.
“Amwana aisup aseeta ido akoto eong bala ti apalar abolobol konye apotu egangitok ka kijaikisi eong agogong,” abala Obukui.
Abu kilip itunga lu aboloboloete ka ngesi acamun aibumakin akanin kanu aijaanakin itunga kaitekoro.
“Ejok karai igangakisi kesi eong kede aomisio. Adaun apak na aimo abootin, erai kwana aijaanakin itunga,” abala Obukui.
Geoffrey Omolo, apolon eicolong loka LC5 lo seuna ko Katakwi distrikt ngesi abu kilip itunga aicor engarenok kede aomisio nu epote aingarakin kesi araun lu itekoro kotoma oijaanakine kanu ajokis naka itunga.
Eyatakit ebe, ebuni araun ainingosit na epol karai eremokisi itunga ipudesia kec ne ejaasi engarenok kwapenat; amukian, aitosiom kede aijaanakin apiyai kanu atiakisio nu ipu.
“Abu eong adumunun eropit konye karaida eraun eong akoranakin aseak kangin elap, mam epedori aitemokin ipudesia luka itunga. Nu alosi eong aswam nesi aitwasam eyapesi kanu aimedaikina itunga,” abala Omolo.
Icie ibore yen ecumit aseak itauon nesi aitegeario naka itemwan lu atiakuni apugan kaimoriarit Akoboi.
“Iwori ber itegiarere aswam naka etem lo Akoboi?” engisit asean ediope.
Mam bobo aseak eyalamasi kede eipone lo inepia ecamusana kane ejaasi engarenok lu ijaanakinete kesi arereng aingarenikin kesi.
“Karai icamutu engarenok aitetenanario kotoma aswam kus, epatanaar aswam ido eraun aseak imedaunete,” abala Stephen Okiror lo Akoboi inerasi kede Aicerit.
Mam Katakwi itegelikina kane ejaasi idistriktan icie lu ejaasi ikambin, ido ilipitos aseak engarenok acakar atiakit aseak bala ikur kobaale kanu kesi kere aimedaun ejok.
