USA – Epresident loko USA, Donald Trump ngesi bobo esiriengu aberu na itoronit ngesi kanu ebe, aibu aisiol ngesi k’alaro na etolosere abolobol naka US Open tennis, ikaru nepetai 20 kau.
Inerasi ka apapula na iyemuta nako Bulaya, abala Amy Dorris ebe, abu ibore ngin kojalak ngesi ‘edeka’ ido “kobilitete apedorosio ke.”
Koiner ke, abala Dorris ebe, abu Trump kotereikin aisur ngesi kokinga na agwanya ke na eposik ko New York eraasi 5.09.1997.
Dorris, na ikaru 24 kotoma apaarasia kangun ngesi etoronit Trump ebe aitwasam angajep ke kanu abuikin aimielar kwap na emorosing ke.
Abala ebe, abu aswamisioit ngin kijaik etasuro toma aijar ke kere naarai aliditai ngesi neda mam ngesi apedoria aisi nepecepe kanen.
“Abu kimiela kwap na emorosing ka ido atamait eong aijukar ngesi awai. Nen do nesi abu ngesi kiketakinor alidit eong ido abu kotingiting iwos ka, ikisinga ka, epura ka, kede idio ibore kere,” abala Dorris.
Eyatakit ebe, “mam eong ibore edolit anyara aswamisioit na isitorio itunganan angajep ke kwap na emorosing itunganan icie. Konye abu eong kitwasam ikela aremoria angajep ke ido amuno eong bala abu eong ekangas angajep ke.”
Kitwasamae epulida ke, abu Trump kopega akiro ngun kere. Abu Dorris na iboyei ko Florida, kijaik arotak iyemuto aidules kede ajenanut na angurian ke kaimoriarit abaluwa ke na alositor aite abolia ngina.
Arai Trump ikaru 51 kotoma apaarasia kangun ido kodukosi ka aberu ke naiyareit, Maples.
Ingongasi akiro ko US
Euniara Trump ka akiro ke Dorris, ido etasuro nesi bobo abu kiting itunga akaulo aisisiaun ebe, aponi bobo ijukakinai Trump epoison kotoma obaluwa.
Aponi kikamunai epoison ngol eroko edolo otogo lo apolon lo Amerika, abalasi engarenok elimokinete arotak iyemuto.
Ebaluwa lo nesi ikamunitai kotoma aduketait na ijililiere akiro kere nu elomarete otogo lo ejai epresident lo Amerika.
Etogogongitos ebe, ajai epoison ngol toma na aburetait na ebaluwa ido aponi kojenunai kwape epoison lo ejai toma omarogei luko Bulaya, karaida mam ber, eyaitone loka Trump elimoro kanu kangun.
Ejaasi Federal Bureau of Investigation (FBI) kede Secret Service, aingic ne ebunitor ebaluwa ngol kede aisisiaun aria ijukunitai icie aisitor toma olago lo edakit akiro nu ipu ko US.
“Kotoma apak kana, emamei ber aitukuriano na ewomitai bala eyaunit ebaluwa lo ne ejaasi itunga,” abalasi luka FBI, Naemukaaga.
