PALLISA – Abu Yesu kitajaru Lazaro akaulo adaun apak etwanit, ibore yen abu komukak itunga aumonokin.
Jessica Amulen na ijaanakini Loasuban ko Light Christian Ministries ngesi da abu kisirieng itunga ka iyemuto lu ngesi da ajarun kosabiiti lo atubor.
Amulen ngesi abala ebe, abu Lokasuban konyara emoyo ke adaun apaarasia akanyape do konye aibeleun alimokin itunga nu itoodikitai ngesi.
Abu etasuro ngol kitum eitela Kakurach ko Pallisa kapaaran Naiwongonet eraasi 15.09.2022.
Abala Amulen ebe, abu Lokasuban kicorak ngesi alemar episo lo edonyokit akan ke kede alacar itima.
“Aloto eong, abu adum irotin iyarei, lo elala keda lo ediding ido kojaasi itunga iyarei lu apotu omariata eong kitoni ediopet ajalakin eong, etori do eong orot lo adiding,” abala Amulen.
Eyatakit ebe itodikina ngesi iboro lu ipu lu ikamunitos arokisio nu akwap ido ekoto Lokasuban itunga aijulakin.
“ Aponi oyangarai eong konye abu eong awanyu iboro lu ikamanara keda adiakar na apolor kakwap.”
Kasia Okiria, okilenike Amulen ngesi abala ebe, mam kesi opotu ongurianata noi naarai erai ainapetait Edeke kwape alimokitor itunga otoma ailip kede airujasia ebe, iworori idiope itunganan konye inyakuni.
Rev. Stephen Odata loko Light Christian Ministries ngesi abala ebe anyoun ne iwororia Papa Edeke Amulen, mam kesi opotu kopalasi ailip naarai ajenete kesi ebe ebonguni.
“Aanyoun ne ewororia Papa Edeke Amulen, apotu isio eyatakisi ailip kede aingainga Edeke ainyakun ngesi konye abu emoyo kolimoki isio ebe ebuni ngesi ajarun Kaneemukaaga ido iwanyu ngun isomaunos,” abala Odata.
Amojong Hellen Apolot na elomunit ko Kapala Gogonyo ngesi aumokit ebe, mam ewanyunitor akiro kwakangun ageun auruno ke.
Eyatakit ebe, abu ngesi kosal okanisa kanu awanyun abeit.
Richard Okwatum, apolon eicolong LC1 ko Kakurach ngesi abala abu ngesi kolot adumun Amulen emudukit kiperikitete olutari konye asubit bala mam etau apalarit aswam.
Peter Ogada, awean eijiri ko Light Christian Ministries ngesi abala ebe, mam na erai nasodit kokanisa kalo.
John Solomon Okanya apolon ecolong LC3 kotem Kaukura ngesi abala ebe, “abunit eong ne ideuna apaaran adiope na abalasi elipak enyounio Amulen ido adumunit eong ngesi eperi koingaren na ekanisa konye komam eiyengane ke apupo bala itunganan yen ejari.”
Abu kisinyikokoik itunga aicat aima Loaksuban mere aremokin aitemisio ne ejai Edeke.
“Ejok arai eraasi nu ainapeta nuka Edeke.”
Emamei ber emuron lo adekis lo abu kitigogong nu atwanare ke Amulen, ibore ijaikit itunga icie itepegitos nu ajarun ke, kobalasi icie ebe, ekoto ber aingic akiro ngun kaidules tetere mam ikanisan ijoriorete itunga.
