PALLISA – Atukot naka ojokotau kojena kwape citizens initiative for democracy and development Uganda (CIDD[1]UG) ipadicasi keda ajakanut na odistrikita lo Pallisa kesi aseutu Kaucho farmers association,Kagoli youth development association keda mother to mother association Putiputi.
Fred Ejautene edairekita lopeti ko CIDD-UG ngesi abala ebe, atukono nu kesi ejaikitai 4.5m naarai apotu isidedeleutu ainapeta nu ejokuka ayuarit ka itoswam isuban Edeke ejok igangitos aitojokario na ekuse lo ikwamin.
Ejautene ngesi abala ebe, lu iuni kesi edumunitos agangat na kotoma British council kanu ajaikin abolobol na akwapin kere na ejaikin olap lo itomonet kadiop itolosete olago.
David Okurut arucokiniton loka Kagoli youth development association ngesi abala ebe, itolosete aipit ao kanu esike ido koyuwaritos ikoto naarai nesi ikajete amoliga.
Zabulon Adupa, lo Kaucho farmers ngesi abala ebe, itosomaete kesi ainapeta nu itojokaritai kanu akoriok komam emunamunaete isuban Edeke.
“Atukot ka na Mother to mother nesi ingarenikit aisub asigirin numam enyamete atotole, ido ingarakitos itunga aipam ikiyal lu mam enyamete akito.
Martin Okello, ayaiton ajakanuto ko Pallisa ngesi abu kicorak atukono nu aswam ejok abwokin Pallisa tetere itanyanyario aimedaun.
“Ecowak imusugun ijaikinete yesi isirigin did alokuna Ido arai iswamata ejok iyatakinete,” abala Okello.
Mohamed Samuka apolokiton erionget lo isuban Edeke ngesi abala ebe, ibore ejaiki ipiriotin lu edwarete ekuse lo ikwamin itapasikina erai naarai alomakisi itunga ikoto isama ibore akoto itunga airereor aswamisio kec nu arokok.
“Atutubena nu idaritere isuban Edeke ejok mam akalele elomanakini, edou da etepi ejok kojatara akamu na alapio idis naarai nu erarata ikoto akwi bon,” abala Samuka.
Abala ebe, apedosi kesi aswam, ido ebe akoto ekasulo lo itet aingarenikin arokun nu ejokuka koingarenone kosodi aijal numam ejokuka.
