SOROTI – Naikanyet natubor, nesi abunio epate loka NRM kitolosio aseo na imeeban lu apotu kibwokoto imenderan kanu abwoikin epate kec. Ko Soroti city, epelunos ikiliok iyarei kede aberu adiopet kanu arukor kede abwaak lu elomunitos kotoma opate loka FDC kede lu obonipe; imoriariaritos ngun Jimmy Ekemu (NRM – Soroti Kide) David Calvin Echodu (NRM– Soroti Too) ka Julian Fede Iseet.
Ko FDC, Moses Attan Okia ngesi kwana ebuni arukokin ka Ekemu ka Herbert Edmund Ariko kosodete Calvin Echodu autakin Jonathan Ebwalu (obonipe), Simon Peter Ebitu (obonipe) ka Edmond Elasu (FDC). Ebwalu nges kolejet kotoma aseo naka 2016 abu kibuc airabet kede ikou icucut akaulo na Etunganane apilicun ailany ngesi. Abu Echodu kicodorio Dr Geofrey Egwau adekis nepe eroko atupuruc, akaulo na ailany lo. Egwau nges ejena kanu aijoja kotoma opatei, akaulo na abwaa kotoma opatei luka UPC, FDC ka kwana NRM adaun ikaru 20 etamit alomar airabet. Emamei lo atiaketait kede Col. Kiiza Besigye.
Ebuni do kwana eiri lo angor aijaikin Iseet autakin kede Acom Alobo nako FDC kanu araun aberu nasodit aiya esite loko Soroti. Abu Iseet na sek arai RDC Amuria kolatak aupake Frances Adyango na arai atupiton RDC Nebbi nepepe kede Sheila Amulo ka Margaret Amongin kwap tape ibwoki emendera loka NRM.
Mam nu angor eroko ko Soroti naarai esubit aseo na abu kolot kotoma ainapapara. Konye ko kau kangun kere, NRM nesi ajai ailangilang abwaak lu mam apotu kodumutu apak na apesikin aomisio ka alosikineta nu eipud kec lo akoto abwoikin kec. Ebeit do kwana etaun loko Soroti aitutumaun kede abwaak lu ikunyukunyasi ebe kesi epedorete aitegear Soroti kwape e site.
Edeleleu ebe mam lolo bala NRM ekapakina apalikin esite loko Soroti nejaasi etepegak apugan. Kokau ejeni lem Soroti kwape ne icukere akiro nu aitepeg apugan, ido mam apugan nako NRM ebuni ajotor kane, akaulo na atiakakin Soroti esite Sek kotoma aseo na aijaanakin ko karu lu atuboros, ajena lem Soroti kwape aiboisit na aseeta itunga abwaak lu etepegete apugan; noi noi kotoma ofaya (FDC), konye arai epote akiro ngun aijulakin. Kobukui luko kinga na etaun, kwape Gweri, ebuku Soroti ka Dakabela adau NRM aililiaun itunga kec.
Alomutu abwaak Cosmas Elotu (Dakabela), Patrick Aeku (Soroti), Richard Elimu (Gweri) ka aberu Leah Amigo na eliliaun abwaa komam itepegitai kopate loka NRM.
Abwoitos Elotu kede Vincent Enomu ka William Opit, Kosodi Aeku alomun ko Soroti akaulo na alatakin David Eroku, Samuel Emolu ka Moses Egunyu kwap. Elalaete abwaak luko Soroti ebe abu Aeku komojir aseeta ko Asuret konye itepegit Aeku ngun. Kanu kangun, alimors Emolu ka Egunyu ebe epote kesi abongokin oisawe amariaun emakuk ngon kede Aeku. Edumakinete do kesi James Ekweu lo ebwoi kobuku kangon kwape obonipe orot.
Elimu nges abu kopedo aitelekaar atubon lo eyengunan, Stephen Emuria kanuka Gweri. Konye elalai Emuria ebe ajai epucipuc Aukot.
Kowai lo Angor epote do Anne Adeke Ebaju, Angelline Ossege ka Amigo aitutumaun aseak kede aomisio kec nu ikilatar alosit abwoikin kesi kotoma airabet. Adeke (FDC) nges ber ebwoikinit atumunak luko Uganda kere kotoma airabet, konye kwana ekilakin aukor Angelline Osege na ber ebwokinit angor nuko Soroti adaun ikaru 10.
Ebwoi kwan kwape abonipe akaulo na asukun kotoma FDC. Ilalaete abwaak kwape nat Enomu ebe aponi aseo kipucupucai kede agwelio na aseeta, ibore yen ebuni ainakin ngesi elosi alomun kwape obonipe.
Eroku da nges edelorit ebe abu Aeku kitwasam apiyai kanu agwelunun aseeta kama ejaasi itunga, ido ebe eroko ber ngesi eomomoi nu abwa kwape obonipe. Kokaru 2016 Eroku nges ebwokit emendera loka NRM, konye abu Kenneth Etunganane kilany ngesi.
Kwana do ideuna ilapio ikany toma aseo na ekaru 2021 idelelei cut ebe imielanakin do NRM aibwok Soroti kere kotupitete eipone lo apesikinia abwaak lu imenderan.
